ठाणे वर्तकनगर परिसरातील डिंपल वाईन शॉपवर कारवाई; मात्र मालक काहीच फरक पडत नसल्याच्या आविर्भावात
डिंपल वाईन शॉपवर पुन्हा कारवाई करून अनुज्ञाप्ती रद्द करण्याची मागणी
डिंपल वाईन शॉपचा मालक शासनाचा जावई लागतो का ? – महिलांचा सवाल
रात्री १२ नंतर वर्तकनगर विभाग शांत,मात्र डिंपल वाईन शॉपवर तुफान गर्दी
पोलीस महानगर नेटवर्क
ठाणे – अनेक विद्वान विभूतींच्या विचारांचा वारसा लाभलेलं ऐतिहासिक शहर. ठाण्याची ओळख एक सुसंस्कृत शहर म्हणून आहे. ठाण्यातील विद्यमान पोलीस आयुक्त आशुतोष डुंबरे यांची एक वेगळी छाप पोलीस दलात असून एक कर्तबगार, प्रामाणिक व सर्वांना आपलेसे वाटणारे म्हणून त्यांची ख्याती आहे, मात्र त्याच ठाण्यात राज्य उत्पादन शुल्क अधिकरी व पोलिसांना न जुमानता त्यांच्या डोळ्यादेखत रात्री उशिरापर्यंत वाईन शॉप चालू असते. आश्चर्य म्हणजे पार्टी विथ डिफरन्स अशी तोरा मिरवणाऱ्या भाजपच्या कार्यालयासमोरच हा रात्रीचा खेळ बिनदिक्कत सुरू असतो. शासनाचे सर्व नियम, निकष तोडून, मोडून डिंपल वाईन शॉप रात्री उशिरापर्यंत चालू असते. राज्यातील इतर सर्व वाईन शॉपला एक न्याय तर वर्तकनगर येथील डिंपल वाईन शॉपला वेगळा न्याय अशी दुटप्पी भूमिका शासनाची आहे का ? डिंपल वाईन शॉपचा मालक शासनाचा जावई लागतो का ? असा सवाल परिसरातील महिला विचारत आहेत. शासनाच्या नाकावर टिच्चून रात्री उशिरापर्यंत बिनदिक्कत मद्य विक्री केली जाते.
कायदा बासनात गुंडाळून वाईन शॉप चालू?
परवाना नसताना मद्य बाळगणे तसेच परवाना नसलेल्यांना मद्यविक्री करणे हा गुन्हा आहे. ग्राहकाकडे परवाना आहे की नाही, हे पाहण्याची आणि त्यासाठी योग्य ती सोय उपलब्ध करून देण्याची जबाबदारी विक्रेत्यांवर टाकलेली आहे. या नियमांचे कोणीही मद्यविक्रेता पालन करत नाही. एकाही मद्य विक्री दुकानात मद्य सेवन परवाना विचारला जात नाही
रस्त्यावर टवाळखोरी व रिकाम्या बाटल्यांचा खच
ठाणे शहरातील इतर वाईन शॉप रात्री १०.३० वाजता बंद करीत असल्याने रात्री उशिरापर्यंत चालू असलेल्या डिंपल वाईन शॉपवर नागरिकांची झुंबड उडते. काही ग्राहक रस्त्यावरच बसून तिथेच मद्य प्राशन झाल्यावर रिकाम्या बॉटल रस्त्यावर ठेऊन निघून जातात, परिणामी रस्त्यावर बाटल्यांचा खच पडलेला दिसून येतो, त्याशिवाय या ठिकाणी टवाळखोरांच्या झुंडशाही चा त्रास देखील नागरिकांना होत असतो.
महिलांची सुरक्षा ऐरणीवर
राज्यात सध्या महिला व मुलींवर अत्याचार तसेच बलात्कार सारख्या घटना दिवसेंदिवस घडत आहेत. ठाण्यातील इतर वाईन शॉप वेळेत बंद होत असल्याने व ठाण्यातील एकमेव डिंपल वाईन शॉप हे रात्री उशिरापर्यंत चालू असल्याने ग्राहकांची प्रचंड प्रमाणात गर्दी होत असते. मद्यपी ग्राहकांमुळे परिसरातील व आजूबाजूच्या महिलांना रस्त्यावर फेरफटका मारण्यास धोकादायक वाटते. परिसरातील महिलांना यामुळे मोकळा श्वास घेता येत नाही. बिनदास्तपणे ये – जा करता येत नाही. राज्यातील महिलांच्या बाबतीत घडत असलेल्या घटनांमुळे दुर्दैवाने एखादी घटना या परिसरात घडली तर त्याला जबाबदार कोण ? असा प्रश्न उपस्थित होत आहे. एखादा दुर्दैवी घटना घडण्याची वाट राज्य उत्पादन शुल्क व पोलीस अधिकारी पहात आहेत का ? असा संतप्त सवाल महिला करीत आहेत.
डिंपल वाईन शॉपच्या मालकाने वेळेचे बंधन पायदळी तुडवले
महाराष्ट्र शासनाची मद्य विक्री करण्यासाठी कडक नियमावली आहे. सकाळी १० ते रात्री १०.३० वाजेपर्यंत वेळेचे बंधन घालून दिलेले आहे. मात्र, वर्तकनगर येथील डिंपल वाईन शॉप हे रात्री २.०० वाजेपर्यंत चालू ठेऊन मद्य विक्री करतात हा सर्व गैरप्रकार दैनिक ‘पोलीस महानगर’ च्या प्रतिनिधीने आपल्या कॅमेरात कैद केला आहे तसेच सदर वाईन शॉपची अनुज्ञाप्ती रद्द करण्यासाठी राज्याचे उपमुख्यमंत्री व उत्पादन शुल्क मंत्री अजितदादा पवार, राज्य उत्पादन शुल्कचे तत्कालीन आयुक्त डॉ. विजय सूर्यवंशी यांना निवेदन देण्यात आले असून ठाणे अधीक्षक प्रवीण तांबे यांची प्रत्यक्ष भेट घेऊन कारवाई करण्याची मागणी करण्यात आलेली आहे, तसेच अप्पर पोलीस आयुक्त विनायक देशमुख व ठाणे अधीक्षक प्रवीण तांबे यांनी संबंधित डिंपल वाईन शॉपच्या मालकावर कठोर कारवाई करण्याचे आश्वासन शिष्टमंडळाला दिल्यानंतरही डिंपल वाईन शॉप च्या वेळेमध्ये कुठलाही बदल झालेला दिसून येत नाही. रात्री १२ नंतर अर्ध शटर उघडं ठेऊन व्यवसाय सुरू असतो.
पोलिसांची पेट्रोलिंग नावापुरती
वर्तकनगर परिसरात रात्री ११.३० नंतर पोलिसांची पेट्रोलिंग असूनही डिंपल वाईन शॉप वर कारवाई करण्याचे धाडस पोलीस सुद्धा दाखवू शकत नसल्याने पोलिसांच्या कार्यपद्धतीवर शंका उपस्थित केली जात आहे.
दैनिक पोलीस महानगर च्या शिष्टमंडळाने अधिकारयांची भेट दिले निवेदन
अन्याय, अत्याचार व भ्रष्टाचाराविरुद्ध सातत्याने आवाज उठविणाऱ्या दैनिक पोलीस महानगर च्या शिष्टमंडळाने राज्य उत्पादन शुल्क चे स्थानिक निरीक्षक बिराजदार यांची भेट घेऊन डिंपल वाईन शॉप ची अनुज्ञाप्ती रद्द करण्याची मागणी करण्यात आली आहे.
बिराजदार यांचे आश्वासन
दैनिक पोलीस महानगर ने यापूर्वी केलेल्या तक्रारिवरून डिंपल वाईन शॉप च्या मालकावर दंडात्मक कारवाई करून केस दाखल केलेली आहे. आता सुद्धा आपण पुन्हा दिलेल्या तक्रार अर्जावरून कारवाई करू, असे आश्वासन ठाणे राज्य उत्पादन शुल्क निरीक्षक बिराजदार यांनी शिष्टमंडळाला दिले आहे.