ठाण्यात धावत्या लोकलमध्ये मोबाईलचा स्फोट; प्रवाशांमध्ये प्रचंड खळबळ
योगेश पांडे /वार्ताहर
ठाणे – ठाणे जिल्ह्यात लोकल ट्रेनच्या महिला डब्यात एका अज्ञात महिला प्रवाशाच्या मोबाईल फोनचा स्फोट झाल्याची मोठी घटना घडली. यामुळे लोकलमधील प्रवाशांमध्ये एकच गोंधळ उडाला. एका नागरी अधिकाऱ्याने याबाबतची माहिती दिली आहे. मात्र, या घटनेत सुदैवाने कुठल्याही प्रकारची जीवितहानी घडलेली नाही. सोमवारी १० फेब्रुवारी रोजी रात्री ८ वाजून १२ मिनिटांनी कळवा स्थानकावर सीएसएमटी-कल्याण उपनगरीय ट्रेनमध्ये झालेल्या या घटनेत कोणीही जखमी झालेलं नाही, असे ठाणे महापालिकेच्या आपत्ती व्यवस्थापन कक्षाचे प्रमुख यासिन तडवी यांनी पीटीआयला सांगितले. छत्रपती शिवाजी महाराज टर्मिनस रेल्वे नियंत्रण कक्षाकडून मिळालेल्या वृत्तानुसार, या घटनेत कोणीही जखमी झाले नाही. मात्र यामुळे प्रवाशांमध्ये क्षणिक गोंधळ उडाला, अशीही माहिती त्य़ांनी दिली. मोबाईल फोन स्फोट झाल्यामुळे लोकलमध्ये धुराचे लोट पसरले होते आणि परिस्थिती नियंत्रणात आणण्यासाठी रेल्वे कर्मचाऱ्यांनी अग्निशामक साधनांचा वापर केला, असे त्यांनी सांगितले आहे.याबाबत एका प्रत्यक्षदर्शीने सांगितले की, एक छोटासा स्फोट ऐकू आला, ज्यामुळे डब्यात धूर पसरला आणि अनेक प्रवाशांनी दरवाजाकडे जाण्यासाठी धाव घेतली. यामुळे काही काळ लोकलच्या डब्यात गोंधळाचे वातावरण पसरले होते. रेल्वे पोलिसांनी प्रवाशांना सुखरूप बाहेर काढले, असंही प्रत्यक्षदर्शींनी सांगितले आहे.
ज्या प्रवाशी महिलेचा मोबाईल फोन स्फोट झाला तिची ओळख अज्ञाप पटलेली नाही. सध्या या घटनेचा तपास सुरू आहे. हा मोबाईल स्फोट बॅटरीतील बिघाड किंवा इतर काही तांत्रिक समस्यांमुळे झाला असावा अशी शक्यता वर्तवण्यात येत आहे. प्रवाशांनी सार्वजनिक वाहतुकीवर इलेक्ट्रॉनिक उपकरणं वापरताना सावधगिरी बाळगली पाहिजे, असं एका पोलीस अधिकाऱ्याने सांगितले आहे. मात्र, या घटनेमुळे रेल्वे सेवा विस्कळीत झाली नाही, असेही ते म्हणाले.