धक्कादायक ! अल्पवयीन मुलीवर लैंगिक अत्याचार, आरोपी तरुणीवर पोक्सो अंतर्गत गुन्हा दाखल
पोलीस महानगर नेटवर्क
मुंबई – राज्यात दिवसेंदिवस मुली व महिलांवर अत्याचाराच्या घटनांमध्ये प्रचंड वाढ होत आहे. मुंबईत अशीच एक घटना घडली आहे. दक्षिण मुंबईतून एक धक्कादायक घटना उघडकीस आली आहे. एका अल्पवयीन मुलीसोबत शारीरिक संबंध ठेवल्याप्रकरणी दक्षिण मुंबईतील एका २४ वर्षांच्या तरुणीवर बलात्कार आणि ‘पोक्सो’चा गुन्हा दाखल करण्यात आला आहे. याप्रकरणी तरुणीला अटक झाली असून सध्या तिची रवानगी न्यायालयीन कोठडीत करण्यात आली आहे. ही अल्पवयीन मुलगी ही १७ वर्षांची असून ती सध्या १२ वीमध्ये शिकत असल्याची माहिती समोर आली आहे.
पोलिसांनी दिलेल्या माहितीनुसार, पीडित मुलगी पूर्व उपनगरात राहते तर तिचे नातेवाईक भेंडीबाजार परिसरात राहतात, तर आरोपी तरुणीदेखील त्याच परिसरात राहते. पीडित मुलगी ही नातेवाईकांकडे येऊन-जाऊन असल्याने तिची त्या तरुणीसोबत ओळख होती. त्याच दरम्यान, दोघींमध्ये बोलणे वाढले, मैत्री झाली आणि त्याचं रूपांतर प्रेमात झाले. मात्र हा प्रकार मुलीच्या नातेवाईकांना कळताच त्यांनी तिला गावी पाठवलं. काही दिवस गावी राहिल्यानंतर ती अल्पवयीन मुलगी पुन्हा मुंबईत परतली व पालकांसोबत राहू लागली. याचदरम्यान डिसेंबर महिन्यात ४ वर्षांच्या तरूणीने त्या मुलीशी संपर्क साधला आणि तिला भेटण्यास बोलावलं. दोघींनी सिनेमा पाहिला आणि मग पळून जायचे ठरवलं. ठरल्याप्रमाणे दोघी ६ जानेवारीला पळून गेल्या. बराच उशीर होऊनही मुलगी घरी न आल्याने पालकांनी शोधाशोध करून अखेर पोलिसांत अपहरणाचा गुन्हा दाखल केला होता.
तांत्रिक बाबींच्या आधारे पोलिसांनी शोध घेतला असता त्या दोघी विरारमधील एका रिसॉर्टमध्ये असल्याचे आढळून आले. पोलिसांनी तेथे जाऊन दोघींना ताब्यात घेऊन मुंबईत आणले. दोघींमध्ये जे घडले ते समोर आल्यानंतर २४ वर्षांच्या तरुणीवर बलात्कार व ‘पोक्सो’चा गुन्हा दाखल करून तिला अटक करण्यात आली. दोन दिवस त्या हॉटेलमध्ये थांबल्या, तर तीन दिवस एका भाडय़ाचे घर घेऊन राहिल्या होत्या अशी माहिती देखील समोर आली आहे. पोलीस याप्रकरणी अधिक तपास करीत आहेत.