कल्याण शहरात गुन्हेगारीच्या घटनांमध्ये प्रचंड वाढ, भाजपच्या ज्येष्ठ कार्यकर्त्यावर जीवघेणा हल्ला, घटना सीसीटीव्हीत कैद
योगेश पांडे/वार्ताहर
कल्याण – कल्याण पश्चिमेतील आणखी एक धक्कादायक घटना समोर आली आहे. भाजपचे ज्येष्ठ कार्यकर्ते हेमंत परांजपे यांच्यावर जीवघेणा हल्ला झाल्याची धक्कादायक माहिती समोर आली आहे. संबधित घटना ही शनिवारी रात्री १० वाजेच्या सुमारास घडली आहे. हेमंत परांजपे पारनाका परिसरातून जात असताना एका मोटरसायकलवर आलेल्या दोन अज्ञात व्यक्तींनी त्यांच्यावर लाथा बुक्क्यांसह रस्त्यावर असलेले मोठ्या दगडांनी बेदम मारहाण केली आहे. या घटनेमुळे परिसरात एकच खळबळ उडाली आहे. आरोपी हेमंत परांजपे यांच्यावर मोठमोठे दगड टाकून त्यांना ठेचण्याचा प्रयत्न करत आहेत की काय? असा प्रश्न मनात निर्माण होईल, इतक्या भयानक पद्धतीने मारहाण करण्यात आली आहे. या घटनेचे सीसीटीव्ही फुटेज सुन्न करणारे आहेत. आता या प्रकरणातील मारहाण करणाऱ्या आरोपींच्या मुसक्या आवळण्यात पोलिसांना यश येतं का? ते पाहणं महत्त्वाचं ठरणार आहे.
या हल्ल्यात हेमंत परांजपे गंभीर जखमी झाले आहेत. त्यांच्यावर कल्याण पश्चिमेतील एका खाजगी रुग्णालयात उपचार सुरू आहेत. हेमंत परांजपे यांच्यावर नेमका कोणी आणि का हल्ला केला? या प्रश्नाचं उत्तर अद्याप समजू शकलेलं नाही. पण या घटनेमुळे हेमंत परांजपे यांच्या समर्थकांकडून संताप व्यक्त केला जातोय. या प्रकरणी आता पोलिसांकडून काय कारवाई केली जाते ते पाहणं देखील महत्त्वाचं आहे.