गुन्ह्यात बनावट कागदपत्र सादर करणाऱ्या रमेश पारसेवारसह आठ जणांविरुध्द पोलीस ठाण्यात गुन्हा दाखल
पोलीस महानगर नेटवर्क
नांदेड – नांदेडमधील ग्रामीण पोलीस ठाण्याच्या हद्दीत एका गुन्ह्याच्या तपासात बनावट कागदपत्र दाखल केल्याप्रकरणी एका उद्योजक महिलेने दिलेल्या तक्रारीवरुन पोलीसांनी गुन्हा दाखल केला नाही म्हणून महिलेने न्यायालयात धाव घेतली होती. न्यायालयात महिलेचया तक्रारीला दाद देत ८ जणांविरुध्द गुन्हा दाखल करण्याचे आदेश नांदेड ग्रामीण पोलीसांना दिल्यानंतर नांदेड ग्रामीण पोलीसांनी फसवणूक करणे, खोटे कागदपत्र तयार करणे, कागदपत्र खोटे असल्याचे माहित असतांना ते खरे असल्याचा बनाव करणे आणि यासाठी कट करणे अशा सदरांखाली गुन्हा दाखल करण्यात आला आहे. कमल कुंदन पत्रावळी यांनी न्यायालयात दिलेल्या तक्रारीनुसार एमआयडी बळीरामपूर येथे औद्योगिक भुखंड क्रमांक ए-६/३/३ च्या त्या ताबेदार आणि मालक आहेत. या भुखंडाचे एकूण क्षेत्रफळ १५६८६ चौरस मिटर आहे. या जागेवर रमेश विश्वंभर पारसेवार यांची नजर होती. १८ जानेवारी २०२३ रोजी रमेश पारसेवार आणि त्यांच्या साथीदारांनी या जागेवर कब्जा करण्याचा प्रयत्न केला. त्याप्रकरणी नांदेड ग्रामीण पोलीस ठाण्यात गुन्हा रजि.नं. ३५/२०२३ दाखल आहे.
सदर गुन्ह्याच्या तपासामध्ये त्या प्रकरणातील आरोपींनी काही कागदपत्रे तपास अंमलदाराकडे सादर केली. कमल पत्रावळे यांनी माहितीच्या अधिकारात ही माहिती समोर आणली, १० एप्रिल २०१८ रोजी तयार केलेली सौदाचिठ्ठी, तसेच २० जून २०१८ व २४ सप्टेंबर २०१८ रोजी तयार केलेले संम्मती पत्र/ करार नामा खोटे व बनावट आहे. कमल पत्रावळी यांना आर्थिक नुकसान व्हावे म्हणून हे कागदपत्र तयार करण्यात आले आहे. हे सर्व कागदपत्र हस्ताक्षर तज्ञाकडे पाठविल्यानंतर त्या अहवालात, हस्ताक्षर हे खोटे व बनावट आहे. इतर कागदपत्रांवरील हस्ताक्षराशी ते जुळत नाहीत. त्यानंतर कमल पत्रावळी यांनी १८ एप्रिल २०२३ रोजी पोलीस ठाणे नांदेड ग्रामीण येथे या बाबत तक्रार दिली. पुन्हा २४ एप्रिल २०२३ रोजी पोलीस अधिक्षक नांदेड यांना तक्रार दिली. त्यांच्या या अर्जावर कुठलीच दखल घेण्यात आली नाही. म्हणून कमल पत्रावळी यांनी ऍड. सय्यद अरीबोद्दीन यांच्या मार्फतीने न्यायालयात दाद मागितली. न्यायालयात ऍड. सय्यद अरीबोद्दीन यांनी केलेल्या सादरीकरणानंतर न्यायालयाने फौजदारी प्रक्रिया संहिता १५६ (३) प्रमाणे रमेश विश्वंभर पारसेवार रा. विसावा नगर, भाग्यश्री सत्यनारायण नळगे रा. जंगमवाडी, विजयलक्ष्मी उर्फ अनुराधा संग्राम राणे, संग्राम हरीश्चंद्र राणे दोघे रा. जिल्हा परिषद कॉलनी शहाजीनगर तरोडा, रामजतन बहादुर मंडल रा.उस्माननगर रोड सिडको, कृष्णा राजेंद्र शुक्ला रा. नवा मोंढा नांदेड, मारोती गणपतराव नळगे रा. मराठागल्ली लोहा, सय्यद जमील अशा ८ जणांविरुध्द गुन्हा दाखल करण्याचे आदेश दिले. न्यायालयाने दिलेल्या आदेशानुसार नांदेड ग्रामीण पोलीसांनी आठ जणांविरुध्द भारतीय दंड संहितेच्या कलम ४२०, ४६८, ४७१, १२० (ब) नुसार गुन्हा क्रमांक ८७७/२०२४ दाखल केला आहे. या गुन्ह्याचा तपास पोलीस उपनिरिक्षक ज्ञानेश्वर भोसले हे करीत आहेत.