किरकोळ वादातून पोलीस हवालदाराकडून सर्व्हिस रिव्हॉल्व्हरने पत्नीची गोळी झाडून हत्या
योगेश पांडे/वार्ताहर
नांदेड – एकीकडे गणेशोत्सवाची धामधूम सुरु होती. गणेशोत्सव शांततेत पार पाडण्यासाठी पोलीस कर्तव्यावर होते. याच दरम्यान एका पोलीस कर्मचाऱ्याने आपल्या सर्व्हिस रिवाल्वरमधून गोळी झाडून पत्नीचा खून केल्याची धक्कादायक घटना समोर आली आहे. या घटनेने परिसरात एकच खळबळ माजली. मंगळवारी सायंकाळी ६ वाजेच्या सुमारास धनेगाव परिसरातील आयडियल सोसायटी येथे ही खळबळजनक घटना घडली आहे. पत्नीचा खून केल्यानंतर पोलीस कर्मचाऱ्याने स्वतः पोलीस ठाण्यात हजर होऊन पोलिसांना याबाबतची माहिती दिली. अफजल पठाण असं पत्नीची हत्या करणाऱ्या पोलीस कर्मचाऱ्याचं नाव आहे. अफजल पठाण हे आपल्या कुटुंबीयांसोबत धनेगाव परिसरातील आयडियल सोसायटी येथे राहतात. विमानतळ पोलीस ठाण्यात ते हेड कॉन्सस्टेबल पदी कार्यरत आहेत. त्यांच्या पत्नी नाजीम बेगमसोबत त्यांचे नेहमी छोट्या-छोट्या कारणांवरून वाद होतं असायचे. अफजल पठाण हे मंगळवारी सायंकाळी ड्युटी करून घरी गेले. यावेळी पुन्हा पती-पत्नीमध्ये वाद झाला. हा वाद एवढा टोकाला गेला की पोलीस कर्मचाऱ्याने स्वतः जवळील सर्व्हिस रिवाल्वर काढली आणि थेट पत्नीवर गोळी झाडली.
गोळी लागल्याने नाजीम बेगम यांचा जागीच मृत्यू झाला. गोळीचा आवाज एकूण परिसरातील नागरिकांनी घटनास्थळी धाव घेतली. दरम्यान, पत्नीवर गोळी झाडल्यानंतर आरोपी पोलीस अफजल पठाण हे स्वत: ग्रामीण पोलीस ठाण्यात हजर झाले आणि पोलिसांना या घटनेची माहिती दिली. यावेळी ठाण्यातील पोलिसांना देखील धक्का बसला. अफजल पठाण यांच्या सांगण्यानुसार पोलिसांनी तात्काळ घटनास्थळी धाव घेतली तेव्हा त्यांना नाजीम बेगम यांचा मृतदेह आढळून आला. त्यानंतर पोलिसांनी पंचनामा केला. आरोपी अफजल पठाण हा मद्यधुंद अवस्थेत होता अशी देखील माहिती आहे. त्यांना दोन मुलं असून दोघेही शिक्षणासाठी बाहेर गावी आहेत. किरकोळ वादातून पत्नीचा गोळी झाडून खून केल्याने परिसरात खळबळ उडाली आहे. दरम्यान, या प्रकरणी ग्रामीण पोलिसांनी खुनाचा गुन्हा दाखल केला आहे.