कल्याण डोंबिवलीतील अनधिकृत बार, ढाबे, गुटखा पार्लर यांच्यावर नि:पक्षपातीपणे कारवाई करावी – महापालिका आयुक्त डॉ.इंदु राणी जाखड़
पोलीस महानगर नेटवर्क
कल्याण – पुण्यातील चर्चेत आलेले ड्रग्ज प्रकरण राज्यासह देशात गाजत आहे. पुण्यातील अनधिकृत पब्ज, बार व हॉटेलवर कारवाईचा बडगा उगारल्यानंतर राज्यातील इतर शहरात ठिकठिकाणी कारवाई करण्याचे आदेश राज्याचे मुख्यमंत्री एकनाथ शिंदे यांनी दिले आहेत. कल्याण डोंबिवली परिसरातील अनधिकृत बार, ढाबे, गुटखा पार्लर यांच्यावर नि:पक्षपातीपणे धडक कारवाई करावी, असे निर्देश महापालिका आयुक्त डॉ.इंदु राणी जाखड़ यांनी दिले, या विषयाबाबत परिमंडळ-३ चे पोलीस उपायुक्त सचिन गुंजाळ, महापालिका विभागीय उपआयुक्त, कल्याण व डोंबिवलीतील सहाय्यक पोलीस आयुक्त, पोलीस खात्यातील वरीष्ठ अधिकारी, महापालिकेच्या सर्व प्रभागाचे सहा.आयुक्त व इतर अधिकारी वर्ग यांचे समवेत संपन्न झालेल्या बैठकीत महापालिका आयुक्त डॉ.इंदु राणी जाखड़ यांनी हे निर्देश दिले.
महापालिका क्षेत्रातील अनधिकृत बार, गुटखा पार्लर, ढाबे, टप-या व इतर ज्या ठिकाणी अल्पवयीन मुलांना मद्य विक्री केली जाते, अशा ठिकाणी त्वरीत कारवाई करावी, असे निर्देश मा.मुख्यमंत्री यांनी दिले आहेत. या संदर्भात महापालिकेच्या प्रभागातील सहा. आयुक्तांनी यापूर्वीच नोटीसा बजाविल्या असून पुढील कार्यवाही आता सुरु करण्यांत आली आहे, अशी माहिती त्यांनी यावेळी दिली. ज्या अनधिकृत बार व तत्सम ठिकाणी पोलीस विभागाने गुन्हे दाखल केले आहेत. त्याची यादी त्यांनी महापालिकेस दिली असून, राज्य उत्पादन शुल्क विभागाचे अधिकारी व पोलीस अधिकारी यांच्या समन्वयाने पुढील आठवड्याभरात तीव्रगतीने कारवाई करण्यात येईल, अशी माहिती महापालिका आयुक्त डॉ.इंदु राणी जाखड़ यांनी दिली आहे.
प्रतिक्रिया बॉक्स
कल्याण शीळ रोडवरील मानपाडा पोलीस ठाण्याच्या समोर असलेल्या तनिष्का बारच्या अनधिकृत बांधकामावर कारवाई करण्याची मागणी दैनिक ‘पोलीस महानगर’ चे संपादक विशाल सिंह यांनी केली असता त्यांच्या मागणीच्या पत्राला जुनं बांधकाम असल्याचे थातुरमातुर उत्तर देऊन गेंड्याच्या कातडीच्या अधिकाऱ्याने वेळ मारून नेली. अशा अधिकाऱयांवर देखील महापालिका आयुक्तांनी कारवाई करावी.