पुण्यात जमिनीच्या वादातून तरुणीला जमिनीत जिवंत गाडल्याचा प्रयत्न
योगेश पांडे / वार्ताहर
पुणे – जिल्ह्यात एका तरुणीला जमिनीत जिवंत गाडल्याचा धक्कादायक प्रकार समोर आला आहे. राजगड तालुक्यातील कोंढवळे गावातील ही घटना आहे. तरुणीला जमिनीत गाडलं. २५ ते ३० जणांनी जेसीबीच्या मदतीनं तिच्यावर माती टाकली. तरुणीला जमिनीत जिवंत गाडल्याचा पुण्यातील या घटनेचा व्हिडीओही सोशल मीडियावर व्हायरल होतो आहे. २२ वर्षांची ही तरुणी, जमिनीच्या वादातून तिला जमिनीत गाडण्याचा प्रयत्न केल्याचा आरोप करण्यात आला आहे. जमिनीत गाडलेल्या या तरुणीनं स्वतःच पोलिसात तक्रार दिली आहे. घटनेचा व्हिडीओ व्हायरल होतो आहे, ज्यात तरुणी कंबरेपर्यंत मातीत गाडलेली असल्याचं दिसचं आहे.
तरुणीनं घडलेल्या घटनेबाबत पोलीस स्टेशनमध्ये रितसर लेखी तक्रार दिली आहे. राजगड पोलीस स्टेशनमध्ये गुन्हा नोंदवण्यात आला आहे. जमिनीत गाडण्याचा प्रयत्न केल्याप्रकरणी ३०७ प्रमाणे ४ जणांवर गुन्हा दाखल करण्यात आला आहे. संभाजी खोपडे, तानाजी खोपडे, बाळू भोरकर, उमेश जयस्वाल अशी त्यांची नावं आहेत. या चार जणांवर जीवे मारण्याचा प्रयत्न, शिवीगाळ धमकावणं यानुसार गुन्हा दाखल करण्यात आला आहे. या प्रकरणात १० ते १२ जणांवर गुन्हा दाखल होण्याची शक्यता आहे.