नाशिकच्या म्हसरूळला ६ लाखांचा गुटखा जप्त; म्हसरूळ पोलीस ठाण्यात गुन्हा दाखल !
पोलीस महानगर नेटवर्क
नाशिक – पुण्यानंतर नाशिकमध्ये मोठया प्रमाणावर गुटखा कनेक्शन दिसून येत आहे. पोलिसांनी अनेकवेळा कारवाई करून देखील गुटख्याचे प्रमाण कमी होताना दिसत नाही. अशीच एक घटना दिंडोरी रोडवरील कलानगर येथील गुरुमाऊली बंगला येथे पोलिसांनी छापा टाकून ६ लाख ६० हजार ६० रुपयाचा प्रतिबंधित असलेला पानमसाला व सुगंधित तंबाखूचा साठा म्हणजेच गुटखा जप्त केला. हा साठा अवैधपणे साठवून ठेवला असल्याची माहिती पोलिसांनी मिळाल्यानंतर त्यांनी ही कारवाई केली. पोलीस आल्याची चाहुल लागताच संशयित भास्कर गरड हा फरार झाला आहे.
पंचासमक्ष बंगल्यातील घरझडती घेतली असता त्यात वेगवेगळया रंगाचे प्लॅस्टीक गोण्या व खाकी रंगाचे बॉक्स दिसून आले. त्यात विमल पान मसाला, मिराज किर, काकील टोबॅको, वाह पानमसाला, व्ही-१ टोबॅको, डब्ल्यु चॅव्यींग टोबॅको असे प्रतिबंधीत असलेला एकुण ६,६०,०६० रुपये किंमतीचा पानमसाला व तंबाखू मिळून आला. या छाप्यानंतर भास्कर गरड याचे विरूध्द पोलीस हवालदार देवराम चव्हाण यांनी तक्रार दिली आहे. सदर तक्रारीवरुन म्हसरूळ पोलीस ठाण्यात गुन्हा नोंदवण्यात आला आहे. सदरचा माल कोठून आणला व त्याची विक्री कोठे होणार होती याबाबत तपास चालु आहे.
सदरची कारवाई पोलीस आयुक्त संदिप कर्णिक, पोलीस उप आयुक्त, परिमंडळ-१, किरणकुमार चव्हाण, सहा. पोलीस आयुक्त, पंचवटी विभाग, नितिन जाधव यांचे मार्गदर्शनाखाली वपोनि सुभाष ढवळे, पोउपनि डी. वाय. पटारे, पोउपनि यु.एम. हाके, पोहवा देवराम चव्हाण, बाळासाहेब मुर्तडक, प्रशांत वालझाडे, पोलीस अंमलदार पंकज चव्हाण, पंकज महाले, गिरिधर भुसारे, जितु शिंदे यांच्या पथकाने केली.