प्रशिक्षकाच्या समोर स्विमिंग पुलात बुडून १७ वर्षीय विद्यार्थ्याचा मृत्यू
नवी मुंबईतील वाशी परिसरात घडलेल्या घटनेप्रकरणी पोलिसांकडून गुन्हा दाखल
योगेश पांडे / वार्ताहर
नवी मुंबई – स्विमिंग पुलात बुडून एका १७ वर्षीय विद्यार्थ्याचा मृत्यू झाल्याची दुर्दैवी घटना नवी मुंबईतील वाशी परिसरात घडली. याप्रकरणी पोलिसांनी गुन्हा दाखल केला असून घटनेचा तपास सुरु केला आहे. मयूर डमाळे- १७ असे मृत विद्यार्थ्याचे नाव असून तो अकरावीच्या विद्यार्थी होता. मयूर हा मूळ नेरूळ येथील रहिवासी असून अकरावीच्या वर्गात शिक्षण घेत होता. फादर अग्नेल शाळेतील ३० ते ४० विद्यार्थी शनिवारी दुपारी १ वाजेच्या सुमारास क्रीडा तासिकेसाठी नवी मुंबईतील वाशी तरण तलावात आले होते.
येथे मुलांना पोहण्याचे धडे दिले जाणार होते. त्यासाठी क्रीडा शिक्षकाने विद्यार्थ्यांना स्विमिंग पुलात उतरवले. दरम्यान, शिक्षकांच्या सल्ल्यानुसार काही विद्यार्थ्यांनी पोहण्यासाठी स्विमिंग पुलात उडी घेतली आणि सराव करू लागले. दुसरीकडे मयूर याला पोहता येत नव्हते. इतर मुलांप्रमाणे आपल्याला पोहता यावे, या आशेने मयुरनेही स्विमिंग पुलाच्या पाण्यात उडी घेतली. मात्र, पोहता-पोहता तो खोल पाणी असलेल्या क्षेत्रात गेला व तेथेच बुडाला.
बराच वेळ होऊनही मयूर बाहेर न आल्याने उपस्थित प्रशिक्षक, शिक्षक आणि इतर विद्यार्थ्यांनी त्याची शोधाशोध सुरू केली. यावेळी मयूरचा स्विमिंग पुलाच्या पाण्यात बेशुद्ध अवस्थेत आढळून आला. त्याला उपचारासाठी रुग्णालयात दाखल केलं असता, डॉक्टरांनी मृत घोषित केलं. शिक्षकांच्या निष्काळजीपणामुळे मयूरचा मृत्यू झाल्याचा आरोप कुटुंबियांनी केला आहे. याप्रकरणी पोलिसांकडून गुन्हा दाखल करून तपास सुरु करण्यात आला आहे.