मंत्रालय परिसरात ‘व्हीआयपी थाट’वर कारवाई!
८० वाहनांवरील बेकायदा दिवे-सायरन जप्त; मुंबई पोलिसांची धडक मोहीम
पोलीस महानगर नेटवर्क
मुंबई : मंत्रालय परिसरात बेकायदा लाल-निळे दिवे आणि सायरन लावून ‘व्हीआयपी’ थाटात फिरणाऱ्या वाहनांवर मुंबई पोलिसांनी मोठी कारवाई करत तब्बल ८० वाहनांवरील दिवे आणि सायरन जप्त केले. या धडक मोहिमेमुळे नियम मोडणाऱ्यांमध्ये एकच खळबळ उडाली आहे.
मिळालेल्या माहितीनुसार, मंत्रालय परिसरात काही वाहनचालक बेकायदेशीरपणे फ्लॅश लाईट, हूटर (सायरन) आणि विविध प्रकारचे विशेष दिवे लावून स्वतःला ‘व्हीआयपी’ दर्शवण्याचा प्रयत्न करत होते. यामुळे वाहतुकीत अडथळे निर्माण होत होते तसेच सर्वसामान्य नागरिकांना त्रास सहन करावा लागत होता.
या पार्श्वभूमीवर मुंबई पोलिसांच्या वाहतूक विभागाने विशेष मोहीम राबवत मंत्रालय परिसरात नाकाबंदी केली. तपासणीदरम्यान नियमांचे उल्लंघन करणाऱ्या वाहनांची तपासणी करून तात्काळ कारवाई करण्यात आली. बेकायदेशीर दिवे आणि सायरन जागेवरच काढून जप्त करण्यात आले, तसेच संबंधित वाहनचालकांवर दंडात्मक कारवाईही करण्यात आली.
पोलीस अधिकाऱ्यांनी स्पष्ट केले की, केवळ अधिकृत शासकीय वाहनांनाच विशिष्ट परिस्थितीत सायरन आणि दिवे वापरण्याची परवानगी आहे. इतर कोणत्याही वाहनावर अशा प्रकारचा वापर करणे मोटार वाहन कायद्यानुसार गुन्हा आहे.
मुंबई पोलिसांनी नागरिकांना आवाहन केले आहे की, नियमांचे पालन करावे आणि वाहनांवर बेकायदेशीर उपकरणे लावू नयेत. अशा कारवाया पुढेही सातत्याने सुरू राहणार असल्याचा इशाराही देण्यात आला आहे.