खाकीतला ड्रग्ज साखळीचा सूत्रधार; नगर एलसीबीतील पोलिसाला अटक
पोलीस महानगर नेटवर्क
पुणे/अहिल्यानगर : अहिल्यानगर जिल्हा पोलीस दलाच्या स्थानिक गुन्हे शाखेत कार्यरत असलेला शामसुंदर विश्वनाथ गुजर (बक्कल नं. २२०५) हा खाकी वर्दीतला ड्रग्ज माफिया असल्याचं धक्कादायक वास्तव उघडकीस आलं आहे. पुणे पोलिसांनी पहाटे चार वाजता गुजरला अटक केली असून, या कारवाईमुळे पोलीस खात्यात मोठी खळबळ उडाली आहे.
पुणे ग्रामीण पोलिसांच्या स्थानिक गुन्हे शाखा आणि शिरूर पोलिसांनी संयुक्त कारवाई करत गॅरेज चालक शादाब रियाज शेख (वय ४१) याला १ किलो ५२ ग्रॅम एमडी (मेफेड्रोन)सह अटक केली होती. जप्त करण्यात आलेल्या अमली पदार्थांची बाजारभावानुसार किंमत सुमारे २५ कोटी रुपये असल्याचं सांगण्यात येत आहे.
या प्रकरणातील चौकशीत शादाब शेखकडून मिळालेल्या माहितीतून धक्कादायक बाब समोर आली. जप्त एमडीचा थेट पुरवठा अहिल्यानगर एलसीबीतील पोलीस कर्मचारी शामसुंदर गुजर याने केल्याचं स्पष्ट झाल्याने तपासाला वेग आला. त्यानंतर पुणे पोलिसांनी तातडीने हालचाली करत पहाटे गुजरला ताब्यात घेतलं.
खाकी वर्दीतील पोलीसच ड्रग्ज तस्करीत सक्रिय असल्याचं उघड झाल्याने पोलीस दलाच्या प्रतिमेला मोठा धक्का बसला आहे. प्राथमिक तपासात गुजरने यापूर्वीही अशाच प्रकारच्या व्यवहारात सहभाग घेतल्याचा संशय व्यक्त केला जात असून, या साखळीत आणखी कोणकोण सामील आहेत, याचा सखोल तपास सुरू आहे.
दरम्यान, या प्रकरणात अंतर्गत चौकशीचे आदेश देण्यात आले असून, संबंधित अधिकाऱ्यांची भूमिका तपासली जाणार आहे. ड्रग्ज तस्करीविरोधातील कारवाईतच पोलीस दलातील ‘काळी मेंढरं’ उघडकीस आल्याने राज्यभरात या घटनेची चर्चा सुरू आहे.