आंतरराज्य अंमली पदार्थ तस्करी टोळीवर मोक्का; १४ आरोपींवर ठाणे पोलिसांची दुसरी मोठी कारवाई
पोलीस महानगर नेटवर्क
कल्याण : ओडिशातून गांजाची मोठ्या प्रमाणावर खरेदी करून महाराष्ट्रातील विविध शहरांत विक्री करणाऱ्या आंतरराज्यीय अंमली पदार्थ तस्करी टोळीविरोधात ठाणे पोलिस आयुक्तालयाने महाराष्ट्र संघटित गुन्हेगारी नियंत्रण अधिनियम (मोक्का) अंतर्गत दुसरी कारवाई केली आहे. या प्रकरणात एकूण १४ आरोपींवर मोक्का लावण्यात आला असून १६ लाख ३५ हजार रुपयांचा मुद्देमाल जप्त करण्यात आला आहे.
२८ ऑगस्ट २०२५ रोजी गुप्त माहितीच्या आधारे महात्मा फुले चौक पोलिस ठाणे व कल्याण वाहतूक शाखेच्या संयुक्त पथकाने कल्याण रेल्वे स्थानक परिसरात छापा टाकला. छत्तीसगड नोंदणीच्या निळ्या रंगाच्या सुझुकी बलेनो कारमधून गांजा विक्रीसाठी आलेल्या आरोपींनी पोलिसांना चुकवण्यासाठी पाठलागादरम्यान पोलिस कर्मचाऱ्याच्या अंगावर वाहन घालून जीवघेणा हल्ला करण्याचा प्रयत्न केला. मात्र पोलिसांनी तत्परतेने कारसह एका आरोपीला ताब्यात घेतले.
तपासात कारमधून ३५ किलो ४०० ग्रॅम गांजा, गावठी पिस्तूल व जिवंत काडतुसे जप्त करण्यात आली. या प्रकरणात महात्मा फुले चौक पोलिस ठाण्यात गंभीर कलमांखाली गुन्हा दाखल करण्यात आला. पुढील तपासात नागपूर, भिवंडी व ओडिशा येथील आणखी आरोपींना अटक करण्यात आली.
तपासात या टोळीविरोधात नागपूर शहरातील विविध पोलिस ठाण्यांत एनडीपीएस अंतर्गत ४० हून अधिक गुन्हे दाखल असल्याचे उघड झाले. संघटित पद्धतीने अंमली पदार्थांची वाहतूक व विक्री करत असल्याचे निष्पन्न झाल्याने मोक्का लावण्यास परवानगी देण्यात आली. अटक आरोपींना न्यायालयात हजर केले असता २३ डिसेंबर २०२५ पर्यंत पोलिस कोठडी मंजूर करण्यात आली आहे.
ही कारवाई अपर पोलिस आयुक्त संजय जाधव, पोलिस उप आयुक्त अतुल शेंडे यांच्या मार्गदर्शनाखाली वरिष्ठ पोलिस निरीक्षक बलिरामसिंग परदेशी व त्यांच्या पथकाने केली. पुढील तपास सहाय्यक पोलिस आयुक्त डॉ. कल्याणजी घेटे करीत आहेत.