पुण्यात अंमली पदार्थांची तस्करी करणाऱ्या रिक्षाचालकाला अटक; ६ लाख १८ हजार रुपये किमतीचे ३० ग्रॅम मेफेड्रोन जप्त
योगेश पांडे / वार्ताहर
पुणे – पुणे शहरात अंमली पदार्थांची तस्करी करणाऱ्या एका रिक्षाचालकाला अंमली पदार्थ विरोधी पथकाने अटक केली आहे. आरोपीकडून ६ लाख १८ हजार रुपये किमतीचे ३० ग्रॅम मेफेड्रोन आणि वाहतुकीसाठी वापरलेली रिक्षा असा एकूण ७ लाख २८ हजार रुपयांचा मुद्देमाल जप्त करण्यात आला आहे.
अदिल करिम बागवान (३५) असं अटक करण्यात आलेल्या आरोपीचं नाव आहे. रिक्षाचालक असलेला बागवान हा अमली पदार्थांची तस्करी करत असल्याची गोपनीय माहिती अंमली पदार्थ विरोधी पथकाला मिळाली होती. मिळालेल्या माहितीनुसार, बागवान हा गंगाधाम-बिबवेवाडी रस्त्यावर मेफेड्रोनची विक्री करण्यासाठी येणार होता. पोलिसांनी तत्काळ त्या ठिकाणी सापळा रचून त्याला ताब्यात घेतलं. त्याची झडती घेतली असता, त्याच्याकडे ३० ग्रॅम मेफेड्रोन (एमडी) आढळून आलं. पोलिसांनी मेफेड्रोनसह त्याची रिक्षा आणि मोबाईलदेखील जप्त केला आहे.
अंमली पदार्थ विरोधी पथकाचे पोलीस निरीक्षक प्रशांत अन्नछत्रे, संदीप शिर्के यांच्यासह अंमोल सरडे, सचिन मावळे, दयानंद तेलंगे-पाटील, विठ्ठल साळुंखे, नीलेश जाधव, रिहान पठाण, आशा भिंगारे, विद्या सावंत यांनी ही यशस्वी कामगिरी केली आहे. या रॅकेटचे जाळे अधिक मोठे असण्याची शक्यता आहे. आरोपी बागवान याने हे मेफेड्रोन नेमके कोणाकडून खरेदी केले आणि तो पुण्यात कोणाकोणाला विक्री करणार होता, या मुख्य दिशेने पोलीस कसून तपास करत आहेत.