ठाणे रेल्वे स्थानकात तरुणीसोबत विनयभंगाचा धक्कादायक प्रकार; दिव्यातून ५८ वर्षीय आरोपीला अटक
योगेश पांडे / वार्ताहर
ठाणे – ठाणे रेल्वे स्थानकावर महिला प्रवाशांच्या सुरक्षेला गंभीर धोका निर्माण करणारी धक्कादायक घटना समोर आली आहे. कल्याणच्या दिशेकडील फलाट क्रमांक ३ वरील ब्रिजवर चढत असलेल्या एका २१ वर्षीय तरुणीचा विनयभंग करण्यात आला.
मिळालेल्या माहितीनुसार, शुक्रवारी घडलेल्या या लाजिरवाण्या प्रकारानंतर ठाणे लोहमार्ग पोलिसांनी तात्काळ कारवाई करत सुनील पारकर (५८) या आरोपीला दिव्यातून अटक करण्यात आली आहे. वरिष्ठ पोलिस निरीक्षक अर्चना दुसाने यांनी दिलेल्या माहितीनुसार, याप्रकरणी ठाणे लोहमार्ग पोलिस ठाण्यात विनयभंगाचा गुन्हा दाखल करण्यात आला आहे.
महिला प्रवाशांच्या सुरक्षिततेचा मुद्दा या घटनेमुळे पुन्हा एकदा ऐरणीवर आला आहे. गजबजलेल्या रेल्वे स्थानकात दिवसाढवळ्या असे प्रकार घडत असतील, तर महिलांनी सुरक्षित प्रवास कसा करायचा, असा संतप्त सवाल यानिमित्ताने उपस्थित होत आहे. या घटनेमुळे रेल्वे स्थानकातील सुरक्षा व्यवस्थेवर आणि महिलांच्या प्रवासावर गंभीर प्रश्नचिन्ह उभे राहिले आहेत.