📰 इराणी टोळीतील कुख्यात सज्जाद पठाण अखेर काळाचौकी पोलिसांच्या जाळ्यात! आधीच १६२ गुन्ह्यांची नोंद, पोलिसांची शिताफीने कारवाई

📰 इराणी टोळीतील कुख्यात सज्जाद पठाण अखेर काळाचौकी पोलिसांच्या जाळ्यात! आधीच १६२ गुन्ह्यांची नोंद, पोलिसांची शिताफीने कारवाई

सुधाकर नाडार / मुंबई 

मुंबई – मुंबईत फसवणूक, चोरी आणि हातचलाखीच्या गुन्ह्यांमधून नागरिकांना वेठीस धरणाऱ्या इराणी टोळीचा कुख्यात आरोपी सज्जाद गरीबशहा इराणी उर्फ पठाण (वय ४६) अखेर काळाचौकी पोलिसांच्या ताब्यात आला आहे. या आरोपीवर तब्बल १६२ गुन्ह्यांची नोंद असून, त्याच्या अटकेमुळे पोलिसांनी एका मोठ्या गुन्हेगारी साखळीवर घाव घातला आहे.

ही कारवाई ५ ऑक्टोबर २०२५ रोजी झालेल्या फसवणुकीच्या तपासादरम्यान उघडकीस आली. फिर्यादी सुमित्रा रामकृष्ण सांपरग (वय ७७) या ज्येष्ठ महिलेला दोन अनोळखी इसमांनी “सोने चोरी होणार आहे” असा खोटा धाक दाखवून हातचलाखीने दोन सोन्याच्या बांगड्या आणि एक माळ लंपास केली होती.

या प्रकरणी काळाचौकी पोलीस ठाण्यात गु.र.क्र. ३८९/२०२५ अंतर्गत कलम ३१८(४), ३(५) भा.न्या.स. २०२३ नुसार गुन्हा नोंदविण्यात आला.

तपासादरम्यान पोलिसांनी परिसरातील १५० हून अधिक सीसीटीव्ही फुटेज तपासले. तांत्रिक पुरावे आणि गुप्त बातमीदारांच्या माहितीच्या आधारे पोलिसांनी आरोपीचा माग काढला. तपासात आरोपी हा सज्जाद गरीबशहा इराणी उर्फ पठाण असल्याचे स्पष्ट झाले. यानंतर पोलिसांनी अकोला जिल्ह्यातील इराणी वस्तीत सापळा रचून सज्जाद पठाणला शिताफीने अटक केली.

ही कारवाई पोलीस आयुक्त श्री. देवेन भारती, सहआयुक्त (गुन्हे व सुरक्षा) सत्यनारायण चौधरी, अपर पोलीस आयुक्त (मध्य विभाग) श्री. विक्रम देशमाने, उपायुक्त (परिमंडळ ४) श्रीमती रागसुधा आर.,सहाय्यक पोलीस आयुक्त (भोईवाडा विभाग) श्री. घनश्याम पलंगे आणि वरिष्ठ पोलीस निरीक्षक (काळाचौकी पोलीस ठाणे) श्री. विजयकुमार शिंदे यांच्या मार्गदर्शनाखाली सहाय्यक पोलीस निरीक्षक अमित भोसले, उपनिरीक्षक धनंजय व्यवहारे, पोलीस शिपाई गोपाळ चव्हाण, पराग शिंदे, खांडेकर आणि पोलीस नाईक गोविंद ठोके यांनी तांत्रिक तपासात आणि अटक मोहिमेत मोलाचे योगदान दिले.

कुख्यात इराणी टोळीविरुद्धची ही अटक काळाचौकी पोलिसांसाठी एक मोठी उपलब्धी ठरली आहे. या कारवाईमुळे मुंबईतील हातचलाखी व फसवणूकप्रकरणी दिलासा मिळेल, असा नागरिकांचा विश्वास आहे. काळाचौकी पोलिसांची शिताफी, गुन्हेगारीविरुद्ध ठाम पाऊल!