जुनी घरे रिपेयर करणाऱ्यांकडून खंडणी उकळणारा आरोपी नेहरू नगर पोलिसांच्या ताब्यात
पोलिस महानगर नेटवर्क
मुंबई – कुर्ला पूर्व येथील नेहरू नगर ठक्कर बप्पा कॉलनी परिसरात जुनी घरे रिपेयर करणाऱ्या ठेकेदारांकडून खंडणी उकळणाऱ्या एका तथाकथित व्यक्तीस पोलिसांनी अटक केली आहे. अटक करण्यात आलेल्या आरोपीचे नाव विजय निकम असे असून त्याच्याविरोधात खंडणीसह संबंधित गुन्हे नोंदवण्यात आले आहेत. परिमंडल ६ चे पोलिस उपायुक्त श्री. समीर शेख यांनी दिलेल्या माहितीनुसार, आरोपी विजय निकम हा नेहरू नगर परिसरात घरांचे रिपेअरिंग करणाऱ्यांकडून सतत पैसे मागत होता. पैसे न दिल्यास मनपा किंवा इतर शासकीय विभागाकडे तक्रार दाखल करून संबंधित ठेकेदार व घरमालकांचे मोठे नुकसान करण्याची धमकी तो देत असे.
याबाबत आलेल्या तक्रारीनंतर पोलिसांनी सखोल तपास केला. त्यानुसार आरोपी विजय निकम हा विविध ठिकाणी बॅनर आणि कटआउटच्या नावाखालीसुद्धा पैसे उकळत असल्याचे समोर आले. ठेकेदार किंवा मालक यांनी त्याला पैसे देण्यास नकार दिल्यास तो त्यांच्या कामांमध्ये अडथळा निर्माण करत असे. सूत्रांच्या माहितीनुसार, विजय निकम सोबत आणखी काही जण या प्रकारात सहभागी असल्याचा संशय आहे. त्यांची चौकशी सुरू असून लवकरच त्यांच्यावरही कारवाई होण्याची शक्यता आहे.
नेहरू नगर पोलिस ठाण्याच्या अधिकाऱ्यांनी सांगितले की, फिर्यादीकडून मिळालेल्या तक्रारीनुसार पोलिस उपायुक्त श्री. समीर शेख यांच्या आदेशावर कारवाई करून रविवारी, दिनांक १४ सप्टेंबर रोजी आरोपीला अटक करण्यात आली. प्राथमिक चौकशीत आरोपीने जुनी घरे रिपेयरिंग बाबत मनपा कार्यालयात तक्रार न करण्याच्या अटीवर खंडणी घेतल्याचे उघड झाले आहे. पुढील तपास नेहरू नगर पोलिसांकडून करण्यात येत आहे.