धावत्या एसटी बसमध्ये प्रवाशावर कोयत्याने जीवघेणा हल्ला करत हल्लेखोराचे स्वत:वरही वार; पोलिसांनी हल्लेखोराला घेतलं ताब्यात
योगेश पांडे / वार्ताहर
बारामती – बारामतीमध्ये भयंकर घटना समोर आली आहे. बसमध्ये कोयत्याने हल्ला झाल्याची घटना समोर आली आहे. बारामती – इंदापूर मार्गावरील एसटी बसमध्ये एका धक्कादायक घटनेने खळबळ उडाली आहे. बारामती येथील काटेवाडी येथे चालू बसमध्ये एका व्यक्तीने कोयत्याने दुसऱ्या प्रवाशावर वार केला. या कोयत्याच्या हल्ल्यात प्रवासी गंभीर जखमी झाला आहे. विशेष म्हणजे, हल्लेखोराने स्वतःवरही कोयत्याने वार करुन स्वतःला जखमी केल्याची माहिती प्रवाशांनी दिली. ही घटना शुक्रवारी सकाळी साडेदहा वाजण्याच्या सुमारास घडली. प्रवाशांच्या माहितीनुसार, बस काटेवाडी येथे थांबली असताना हा भयंकर प्रकार घडला. हल्लेखोराने अचानक बसमध्ये कोयता काढून एका प्रवाशावर वार केले, त्यानंतर त्याने त्याच कोयत्याने स्वतःवरही हल्ला केला. या घटनेने बसमधील प्रवासी घाबरले आणि एकच गोंधळ उडाला. जखमी प्रवाशाला तातडीने बारामती येथील रुग्णालयात दाखल करण्यात आलं असून, त्याची प्रकृती गंभीर आहे. हल्लेखोरालाही तात्काळ ताब्यात घेतलं असून त्याला वैद्यकीय उपचारासाठी रुग्णालयात नेण्यात आलं आहे.
घटनेची माहिती मिळताच पोलिसांनी घटनास्थळी धाव घेऊन तपास सुरू केला आहे. प्राथमिक माहितीनुसार, हल्ल्यामागील कारण वैयक्तिक वाद असण्याची शक्यता वर्तवली जात आहे. या प्रकरणानंतर बारामती पोलीस ठाण्यात गुन्हा दाखल करण्याची प्रक्रिया सुरू आहे. या घटनेमुळे परिसरात भीतीचं वातावरण पसरलं असून, प्रवाशांच्या सुरक्षिततेबाबतचा प्रश्न उपस्थित झाला आहे. पोलिसांनी हल्लेखोराची चौकशी सुरू केली असून, लवकरच या प्रकरणाचा तपास पूर्ण होईल, असं सांगितलं गेलं आहे. दरम्यान, बारामतीमध्ये गुन्हेगारीच्या घटनांमध्ये दिवसेंदिवस वाढ होताना दिसते आहे. भररस्त्यात हत्या, अपहरण करुन आरोपी हातात शस्त्र घेऊन असल्याचे व्हिडिओ सोशल मीडिया व्हायरल होतात. खून, दरोडे, मारामारी अशा घटना सतत वाढत या वाढत्या गुन्ह्यांवर पोलिसांचा धाक काही उरला की नाही असाच प्रश्न उपस्थित होत आहे.