हैदराबादच्या ठगांकडून पुण्यातील ३५ जणांना साडेआठ कोटींचा आर्थिक गंडा
पोलीस महानगर नेटवर्क
पुणे – हैदराबादस्थित फाल्कन ग्रुप आणि कॅपिटल प्रोटेक्शन फोर्स प्रा. लि. या कंपन्यांनी मासिक ११ ते २२ टक्के परताव्याचे आमिष दाखवत पुण्यातील ३५ गुंतवणूकदारांना तब्बल ८ कोटी ५४ लाख ३४ हजार ८८० रुपयांची फसवणूक केल्याचा धक्कादायक प्रकार समोर आला आहे. फसवणूक झालेल्यांमध्ये डॉक्टर, आयटी अभियंते आणि व्यावसायिक यांचा समावेश आहे. या प्रकरणी अंकुर संजयकुमार धोका (वय ३२, रा. मार्केट यार्ड) यांनी तक्रार दाखल केली असून, मार्केट यार्ड पोलिस ठाण्यात फाल्कन ग्रुपचे एमडी अमरदीप कुमार, संचालक अनिता कुमारी, संदीप कुमार आणि इतर अधिकाऱ्यांविरुद्ध फसवणुकीचा गुन्हा नोंदवण्यात आला आहे. सदर फसवणूक २०२२ पासून सुरू होती.
प्रलोभनातून सुरू झालेली गुंतवणूक
डॉ. अंकुर धोका यांना आत्येभावाकडून फाल्कन ग्रुपची माहिती मिळाली होती. या कंपनीने व्हेंडर इन्व्हॉइस डिस्काउंटिंगच्या नावाखाली गुंतवणूकदारांकडून पैसे गोळा करत असल्याचे सांगितले गेले. सुरुवातीला परतावाही मिळाला, त्यामुळे विश्वास बसला आणि अनेकांनी लाखो रुपयांची गुंतवणूक केली. डॉ. धोका यांनी एकट्याने ११ लाख रुपये गुंतवले होते. परंतु काही महिन्यांनंतर परतावा मिळणे थांबले. कंपनीकडून “तीन महिन्यांत रक्कम परत केली जाईल” असे सांगण्यात आले, मात्र त्यानंतर कोणताही प्रतिसाद मिळाला नाही. हैदराबादमधील ऑफिसमध्ये भेट देण्यासाठी गेलेल्या काही गुंतवणूकदारांना तेथे कार्यालय बंद असल्याचेही दिसून आले.
फसवणुकीची व्याप्ती आणि तपासाची दिशा
या प्रकरणात आरोपींच्या विरोधात हैदराबादमधील सायबराबाद आर्थिक गुन्हे शाखेत आधीच तिन्ही गुन्हे दाखल असून, मुंबईतही एक गुन्हा नोंदवला गेला आहे. कंपनीचे मुख्य कार्यकारी अधिकारी योगेंद्र सिंग, सीओओ आर्यन सिंग आणि इतर २० जणांची नावे तपासात समोर आली आहेत. पुणे पोलिसांच्या आर्थिक गुन्हे शाखेकडे तक्रार मिळाल्यानंतर याप्रकरणाचा तपास सुरू करण्यात आला असून, सध्या ९ गुंतवणूकदारांचे जबाब नोंदवण्यात आले आहेत. कल्याणीनगर, रहाटणी, पिंपळे सौदागर, वाघोली, हडपसर, पाषाण, टिंगरेनगर यांसारख्या भागांतील उच्चशिक्षित नागरिक या फसवणुकीला बळी पडले आहेत.
“या प्रकरणात काही आरोपींना हैदराबाद पोलिसांनी अटक केली आहे. पुढील तपास सुरू आहे,” असे पोलिस निरीक्षक दीपाली भुजबळ (आर्थिक गुन्हे शाखा) यांनी सांगितले.