बीडमध्ये पाचवीत शिकणाऱ्या अल्पवयीन मुलीचे एकाच दिवसात दोन विवाह; पहिला नवरा पसार, तर दुसऱ्याला बेड्या
योगेश पांडे / वार्ताहर
बीड – बीड शहरातील शाहू नगर भागातून एक अतिशय खळबळजनक आणि तितकीच धक्कादायक बातमी समोर आली आहे. यात एका अल्पवयीन मुलीचे एकाच दिवसात दोन विवाह लावण्याचा संतापजनक प्रकार समोर आलाय. या घटनेत पहिल्या नवरदेवाने पळ काढला आहे, तर दुसरा नवरदेवाला पोलिसांनी ताब्यात घेतले आहे. सध्या पोलीस या प्रकरणाचा अधिक तपास करत असून या घटनेने जिल्ह्यात एकच खळबळ उडाली आहे. मिळालेल्या माहितीनुसार, बीड शहरातील तेरा वर्षीय मुलगी नुकतीच पाचवी उत्तीर्ण झाली. मात्र तिच्या वडिलांनी आणि सावत्र आईने तिचा विवाह लावण्याचे ठरवले. पहिला विवाह ३२ वर्षीय मुलासोबत ठरवण्यात आला. तो विवाह झाला देखील, मात्र या लग्नाची माहिती त्याच्या पहिल्या पत्नीला मिळाली. त्यामुळे त्याने तिथून पळ काढला. या नंतर लागलीच दुसरा नवरदेव लग्नासाठी बोलविण्यात आला आणि त्याच्यासोबत या तेरा वर्षीय मुलीचा विवाह लावला गेला. याची माहिती प्रशासनाला मिळताच, पळून जात असताना पोलिसांनी रस्त्यावर अडवून त्या व्यक्तीला ताब्यात घेतले. दरम्यान या प्रकरणी शिवाजीनगर पोलीस ठाण्यात गुन्हा नोंद करण्यात आले असून पोलीसांकडून पुढील कार्यवाई करण्यात येत आहे.