गुढीपाडवा, रमजानच्या पार्श्वभूमीवर नाशिकमध्ये अन्न व औषध प्रशासन अ‍ॅक्शन मोडवर, शेकडो किलो बनावट पनीर नष्ट करत केली मोठी कार्यवाई
योगेश पांडे / वार्ताहर
नाशिक – गुढीपाडवा तसेच रमजान ईदच्या पार्श्वभूमीवर दुध व दुग्धजन्यपदार्थ जसे की पनीर, खवा, मावा इ. खाद्य पदार्थाची प्रचंड मागणी असते. या पार्श्वभूमीवर अन्न व औषध प्रशासनाने शहरातील बनावट पनीर बनवणाऱ्या पेढीवर धाड टाकत ४७ हजार ८०० रूपये किंमतीचा २३९ किलो पनीरचा साठा जप्त केला आहे. प्रशासनाने दिलेल्या माहितीनुसार अन्न व औषध प्रशासनाला मिळालेल्या गोपनीय माहितीच्या आधारे अंबड, नाशिक येथील मे. साई एंटरप्रायजेस, प्लॉट नं. ३०८, साईग्राम कॉलनी अंबड, नाशिक या पेढीमध्ये बनावट पनीर विक्रीसाठी येणार असल्याची गोपनीय माहिती मिळाल्यावरुन अन्न व औषध प्रशासन विभागाने पेढीची तपासणी करुन पेढीमध्ये विक्रीसाठी आढळलेला संशयित पनीरचा २३९ किलो ग्रॅम इतका साठा जप्त करण्यात आला.
अन्न व औषध प्रशासनाने या साठ्यामधून पनीर या अन्न पदार्थाचा नमुना विश्लेषणासाठी घेऊन तो प्रयोगशाळेकडे तपासणी कामी पाठविण्यात आला आहे. तसेच जप्त करण्यात आलेला संशयित पनीरचा साठा हा नाशवंत असल्याने व तो परत खाण्याच्या उपयोगात येवू नये याकरीता त्यावर निळ टाकण्यात येवून साठा अन्न व औषध प्रशासनाकडून महानगरपालिकेच्या घंटा गाडीत नष्ट करण्यात आला. पनीर या अन्न पदार्थाचा नमुना पाठविण्यात विश्लेषणासाठी आला असून विश्लेषण अहवाल प्रलंबित आहे. विश्लेषण अहवाल प्राप्त होताच संबंधितावर अन्न सुरक्षा व मानके कायदा २००६ नुसार पुढील कारवाई करण्यात येणार आहे. ही कारवाई अन्न सुरक्षा अधिकारी संदिप तोरणे, सुहास मंडलिक यांनी विनोद धवड, सहायक आयुक्त (अन्न) यांच्या उपस्थित व महेश चौधरी, सह आयुक्त (अन्न) नाशिक यांच्या मार्गदर्शनाखाली करण्यात आली. एफडीएची पथके शहरातील पनीर उत्पादक व विक्रेते, यांच्यावर लक्ष ठेवणार असून तपासणी करणार आहेत.