बोरिवलीतील दोन पोलीस लाचलुचपत प्रतिबंधक विभागाच्या जाळ्यात; दोघांना अटक
पोलीस महानगर नेटवर्क
मुंबई – राज्यात एकीकडे भ्रष्टाचार फोफावला असताना कोणतंही क्षेत्र भ्रष्टाचार मुक्त झालेलं नाहीय. बोरिवली येथील एका गुन्ह्यांत मदत करण्यासाठी व चारचाकी गाडी सोडवण्यासाठी २० हजार रुपयांची लाच स्वीकारल्याच्या आरोपाखाली सहाय्यक फौजदार सुनील महादेव देसाई (५१) व पोलीस शिपाई विक्रम अतुल शेंडगे (३१) यांना लाचलुचपत प्रतिबंधक विभागाने अटक केली. दोघेही बोरिवली येथील एमएचबी पोलीस ठाण्यात कार्यरत होते. दोन्ही आरोपींना न्यायालयापुढे हजर करण्यात आले असता त्यांना दोन दिवसांची लाचलुचपत प्रतिबंधक विभागाने कोठडी सुनावण्यात आल्याची माहिती देण्यात आली.
याप्रकरणी लाचलुचपत प्रतिबंधक विभागाकडून मिळालेल्या माहिनुसार, तक्रारदारांच्या विरोधात अपघात केल्याप्रकरणी १६ मार्च, २०२५ रोजी बोरिवली येथील एमएचबी पोलीस ठाण्यात गुन्हा दाखल करण्यात आला होता. याप्रकरणात मदत करण्यासाठी तसेच गुन्ह्यांत जप्त करण्यात आलेली तक्रारदाराची चारचाकी वाहन सोडवण्यासाठी आरोपी सहाय्यक फौजदार सुनील देसाई याने लाचेची मागणी केली होती. पण तक्रारदारांना लाच देण्याची इच्छा नसल्यामुळे त्यांनी मंगळवार, १८ मार्च रोजी लाचलुचपत प्रतिबंधक विभाग, मुंबई विभाग येथे जाऊन तक्रार केली. अधिकाऱ्यांनीही तात्काळ तक्रारीची नोंद करून याप्रकरणी तक्रारदारांनी केलेल्या आरोपींची पडताळणी करण्याचा निर्णय घेतला. त्यानुसार मंगळवारी लाचलुचपत प्रतिबंधक विभागाकडून पडताळणी करण्यात आली. त्यावेळी देसाई यांनी तक्रारदारांकडे लाचेची मागमी केल्याचे निष्पन्न झाले. त्यांनी सुरूवातीला ३५ हजार रुपयांची मागणी केली होती. तडजोडीअंती २० हजार रुपये स्वीकारण्याचे मान्य करण्यात आले. पडताळणीनंतर लाचलुचपत प्रतिबंधक विभागाने तात्काळ सापळा रचला. त्यावेळी २० हजार रुपयांची लाच स्वीकारताना पोलीस शिपाई विक्रम शेंडगे यांना पकडण्यात आले.
सदर रक्कम त्यांनी देसाईच्या सांगण्यावरून घेतल्याचे स्पष्ट झाल्यानंतर लाचलुचपत प्रतिबंधक विभागाने याप्रकरणी भ्रष्टाचार प्रतिबंधक कायदा १९८८ कलम ७,१२ अंतर्गत गुन्हा नोंदवण्यात आला. याप्रकरणी दोघांनाही मंगळवारी अटक करण्यात आली. अटकेच्या कारवाईनंतर लाचलुचपत प्रतिबंधक विभागाने दोन्ही पोलिसांना याप्रकरणी न्यायालयापुढे हजर केले असता न्यायालयाने याप्रकरणी दोन्ही आरोपींना दोन दिवसांची लाचलुचपत प्रतिबंधक विभागाची कोठडी सुनावली. याप्रकरणी आता लाचलुचपत प्रतिबंधक विभाग अधिक तपास करीत आहे.