लोणावळ्यात चिमुकलीच्या अपहरणाचा प्रयत्न; अपहरणकर्त्याला पालकांनी चोप देत दिलं पोलीसांच्या ताब्यात
योगेश पांडे/वार्ताहर
लोणावळा– पालकांसाठी अत्यंत महत्वाची बातमी आहे. पालकांनी आपल्या लहान मुलांवर लक्ष ठेवणं गरजेचं आहे. लोणावळ्यात घरातून दोन वर्षीय चिमुकलीचे अपहरण करण्याचा प्रयत्न करणाऱ्या व्यक्तीला स्थानीकांनी पकडून चोप दिला आहे. ही घटना लोणावळ्यात घडली असून अमर त्रिपाठी नावाच्या व्यक्तीला पोलिसांनी बेड्या ठोकल्या आहेत. पोलिसांनी दिलेल्या माहितीनुसार, लोणावळ्यात घरात खेळत असलेल्या दोन वर्षीय चिमुकलीचे अपहरण करण्याचा डाव आरोपी अमरने केला होता. रविवारी दुपारी एकच्या सुमारास चिमुकली राहत असलेल्या घरात शिरला आणि चिमुकलीला घेऊन पोबारा करणार तेवढ्यात चिमुकली मोठ-मोठ्याने रडायला लागली. चिमुकली का रडत आहे? हे पाहण्यासाठी चिमुकलीची आई बाहेर आली. तेव्हा अमर तिला घेऊन पसार होण्याच्या तयारीत होता. घरातील व्यक्तींनी त्याला पकडले आणि चोप दिला. या प्रकरणी लोणावळा पोलिसांनी अमरला अटक केली आहे. पालकांनी अमरला चांगलाच चोप दिला आहे. अद्याप चिमुकलीचे अपहरण करण्याचा प्रयत्न का करण्यात आला याचे कारण समोर आलेलं नाही. पालकांनी आपल्या लहान मुलांवर लक्ष ठेवल्याने अपहरणासारखी मोठी घटना टळली आहे.