ऐकावं ते नवलंच ! मोड आलेले हरभरे खाल्ले म्हणून बायकोने नवऱ्याला बेदम चोपले, बायकोविरोधात गुन्हा दाखल
पोलीस महानगर नेटवर्क
पुणे – ऐकावं ते नवलंच अशा घटना पुण्यात घडतांना दिसत आहेत, एकीकडे पुण्यात मुली व महिलांवर अत्याचार होत आहेत तर दुसरीकडे गुन्हेगारी वाढत चालली आहे अशातच एक विचित्र घटना घडली आहे. क्षुल्लक कारणांवरून नवरा-बायकोची भाडणं ही होतच असतात. या भांडणामध्ये नवऱ्याने बायकोला मारहाण केल्याच्या अनेक घटना तुम्ही पाहल्या असतील. पण बायकोने नवऱ्याला मारहाण केल्याचे तुम्ही ऐकले नसेल. तर पुण्यामध्ये बायकोने नवऱ्याला बेदम मारहाण केल्याची धक्कादायक घटना समोर आली आहे. मोड आलेले हरभरे खाल्ल्याने बायकोने नवऱ्याला लाटण्याने मारहाण केली. याप्रकरणी बायकोविरोधात पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पुणे शहरातील सोमवार पेठेमध्ये ही घटना घडली आहे. घरातील मोड आलेले हरभरे खाल्ल्याच्या कारणावरून नवरा-बायकोमध्ये वाद झाला. हा वाद ऐवढा विकोपाला गेला की बायकोने नवऱ्याच्या डोक्यात मिक्सरचे भांड घालून त्याला जखमी केले. ऐवढ्यावर न थांबता या महिलेने नवऱ्याला लाटण्याने देखील मारहाण केली. सदर घटना रविवारी १ डिसेंबर रोजी घडली. सोमवार पेठेमध्ये राहणाऱ्या महिलेने घरामध्ये हरभरे भिजत ठेवले होते. या महिलेच्या नवऱ्याने मोड आलेले हरभरे खाल्ले. याचा राग आल्याने ही महिला आणि तिच्या नवऱ्यामध्ये जोरदार भांडण झाले. महिलेने नवऱ्याला शिवीगाळ करून लाटण्याने त्याला मारहाण केली. त्यानंतर या महिलेने नवऱ्याच्या डोक्यात मिक्सरचे भांडे मारले. याचसोबत नवऱ्याच्या उजव्या हाताच्या करंगळीचा जोरात चावा घेऊन नख तोडले.
बायकोच्या मारहाणीमध्ये पतीला चांगलीच दुखापत झाली आहे. याप्रकरणी महिलेविरोधात तिच्या नवऱ्याने पोलिस ठाण्यात धाव घेत तक्रार दाखल केली. ४४ वर्षीय नवऱ्याने दिलेल्या तक्रारीनंतर ४० वर्षीय बायकोविरोधात समर्थ पोलिस ठाण्यात गुन्हा दाखल करण्यात आला आहे. समर्थ पोलिस या प्रकरणाचा अधिक तपास करत आहेत. ही घटना पुण्यात सध्या चर्चेचा विषय ठरली आहे.