नाशिकमध्ये उसने पैसे न देता दाजीची दमदाटी, एकाची आत्महत्या; दोघांवर गुन्हा दाखल
पोलीस महानगर नेटवर्क
नाशिक – नाशकात दिवसेंदिवस गुन्हेगारी वाढत चालली आहे. अशीच एक घटना अंबड परिसरात घडली आहे. दाजीला दिलेले पैसे परत न देता भांडण करत मानसिक छळ झाल्याच्या कारणातून पतीने आत्महत्या केल्याच्या तक्रारीनुसार पतीच्या दाजीसह मित्राच्या विरोधात आत्महत्येस प्रवृत्त केल्याप्रकरणी अंबड पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, कोमल भरत गांगुर्डे (रा. चुंचाळे, अंबड) यांनी त्यांच्या तक्रारीमध्ये, पतीचे दाजी संशयित कृष्णा शिंदे यांना पतीने तीन लाख ५० हजार रुपये उसने दिले होते तसेच संशयित राजेंद्र पवार यांनाही पाच लाख रुपये उसने दिले होते. उसने पैसे पती भरत गांगुर्डे यांनी परत मागितले असता दाजी शिंदे यांनी पैसे परत दिले नाहीत. उलट भांडण करत पतीला मानसिक त्रास दिला. या त्रासातून पतीने गळफास घेऊन आत्महत्या केल्याची तक्रार दिली. याप्रकरणी संशयित कृष्णा शिंदे आणि राजेंद्र प्रवर यांच्यावर आत्महत्येस प्रवृत्त केल्याप्रकरणी अंबड पोलीस ठाण्यात गुन्हा रजि. ७६२/२०२४ दाखल करण्यात आला असून अंबड अधिक तपास करीत आहेत.