इंदापुर हादरलं! कायद्याची ‘ऐसी की तैसी’ सुरूच; भर रस्त्यावर तीन राऊंड फायर, एकजण गंभीर जखमी
योगेश पांडे/वार्ताहर
पुणे – बारामतीमधील हत्येची घटना ताजी असतानाच आता इंदापुरात अज्ञाताने एकावर गोळीबार केला आहे. या गोळीबारात एक व्यक्ती गंभीर जखमी झाल्याची माहिती मिळतेय. राहुल चव्हाण असं जखमी झालेल्या व्यक्तीचं नांव आहे. तो इंदापूर तालुक्यातील शिरसोडी गावचा असल्याची माहिती मिळतेय. इंदापुरात तीन राऊंड फायर झाले असून त्यामध्ये राहुल चव्हाण गंभीर जखमी झाल्याची माहिती मिळत आहे. ही घटना घडताच इंदापूर पोलीस घटनास्थळी दाखल झाले आणि त्यांनी जखमीला तातडीने खाजगी रुग्णालयात उपचार दाखल केलं. एक अज्ञात व्यक्ती दुचाकीवरून आली त्याने तीन ते चार राऊंड फायर केले. त्यापैकी तीन राऊंड समोरील व्यक्तीला लागले आणि यात ती व्यक्ती गंभीर जखमी झाल्याची प्राथमिक माहिती आहे.
बारामतीमध्ये एका कॉलेजमध्ये विद्यार्थ्याची कोयत्याने हत्या केल्याची घटना घडल्यानंतर इंदापुरातही गोळीबार झाल्याने सर्वत्र भीतीचं वातावरण आहे. इंदापूरमधील एका महाविद्यालयाच्या समोर सायंकाळी सहा ते साडे सहाच्या दरम्यान ही घटना घडली. या गोळीबारामागचे कारण अद्याप स्पष्ट झालं नाही. या घटनेनंतर पुणे जिल्ह्यातील कायदा आणि सुव्यवस्था मात्र वेशीवर टांगत असल्याचं स्पष्ट झालंय.