नराधम पित्याकडून आपल्या १३ वर्षीय मुलीसोबत राक्षसी कृत्य; डॉक्टरांच्या तपासात नराधम बापाचे ‘पाप’ समोर
योगेश पांडे वार्ताहर
नंदुरबार – जिल्ह्यात महिला आणि अल्पवयीन मुलींवर अत्याचारांच्या घटनांमध्ये वाढ होत आहे. नंदुरबारमध्ये गेल्या तीन दिवसात तीन गुन्हे समोर आले आहेत. आता शहादा तालुक्यातील प्रकाशा येथे वडिलांनी आपल्या १३ वर्षीय अल्पवयीन मुलीवर लैंगिक अत्याचार करत तिला गर्भवती केल्याचा संतापजनक प्रकार उघडकीस आला आहे. नराधम बापाला मुलीच्या आईच्या फिर्यादीवरून अटक करण्यात आली आहे. या घटनेमुळे नंदुरबार जिल्ह्यात संतापाची लाट पसरली आहे. पोलीसांकडून मिळालेल्या माहितीनुसार शहादा तालुक्यातील प्रकाशा येथील ४० वर्षीय पित्याने एप्रिल २०२४ ते जुलै दरम्यान स्वतःच्या १३ वर्षीय अल्पवयीन मुलीशी राहत्या घरी ती एकटी असताना शारीरिक संबंध ठेवून तिला गर्भवती केले. तसेच सदर घटना कोणाला सांगितले तर जीवे ठार मारण्याची धमकी देखील दिली.
त्यामुळे त्या मुलीने वडिलांचा अत्याचार सहन केला. मात्र, पोट दुखत असल्याने तिच्या आईने दवाखान्यात नेले असता ही बाब उघडकीस आली. त्याबाबत विचारले असता मुलीने वडिलांनीच अत्याचार केल्याचे सांगितले. हे ऐकून आई हादरली. त्यानंतर आईने आपल्या मुलीसह शहादा पोलीस स्टेशन गाठत गुन्हा दाखल केला. आईच्या फिर्यादीवरून संशयिता विरोधात पोक्सो कायद्याअंतर्गत गुन्हा दाखल करण्यात आला आहे. आरोपी नराधम बापाला पोलिसांनी अटक केली आहे. पोलीस पुढील तपास करत आहेत.