ताज हॉटेल आणि विमानतळ बॉम्बने उडणून देण्याची धमकी!
मुंबई पोलिसांच्या नियंत्रण कक्षाला धमकीचा फोन आल्याने पोलीस दलात खळबळ
योगेश पांडे / वार्ताहर
मुंबई – मुंबईतून एक धक्कादायक बातमी समोर आली आहे. मुंबई पोलिसांच्या नियंत्रण कक्षाला धमकीचा फोन आल्याने पोलीस दलात खळबळ उडाली आहे. सोमवारी दुपारच्या सुमारास मुंबई पोलिसांच्या नियंत्रण कक्षाला हा धमकीचा फोन आला. मुंबईतील ताज हॉटेल आणि मुंबई विमानतळावर बॉम्ब ठेवल्याचं सांगून अज्ञात व्यक्तीने कॉल कट केला. घटनेचे गांभीर्य लक्षात घेऊन पोलिसांनी उल्लेख केलेल्या ठिकाणी शोध घेतला. मात्र, काहीही संशयास्पद आढळले नाही. पोलिसांनी दिलेल्या माहितीनुसार, हा कॉल उत्तर प्रदेशातून आला असून आता पोलीस कॉल करणाऱ्याचा शोध घेत आहेत. मुंबई पोलिसांना या वर्षात अनेक बनावट किंवा धमकीचे कॉल आले आहेत. यापूर्वी ३१ऑगस्ट रोजीही मंत्रालय बॉम्बने उडवून देण्याची धमकी देणारा फोन आला होता. यानंतर मुंबई पोलिसांनी या प्रकरणी शोधमोहीम राबवली असता, हा धमकीचा फोन अहमदनगर जिल्ह्यातील रहिवासी बाळकृष्ण भाऊसाहेब ढाकणे नावाच्या व्यक्तीने केल्याचे निष्पन्न झाले.
मागच्याच आठवड्यात नागपूर शहरातील सर्वात मोठ्या सीताबर्डी बाजारपेठेत बॉम्ब ठेवल्याचा असाच फोन आला होता. नागपुरातील सर्वात मोठी बाजारपेठ असलेल्या सीताबर्डी बाजारातील दुकानात बॉम्ब ठेवणार असल्याचा फोन ११२ वर आल्याने खळबळ उडाली होती. पोलीस नियंत्रण कक्षाकडून माहिती मिळताच पोलीस आणि बॉम्ब शोध पथकाने घटनास्थळी जाऊन तपासणी केली. सीताबर्डी बाजारातील मोदी नंबर २ आणि मोदी न ३ बाजार ओळीमध्ये बॉम्ब ठेवणार असल्याची धमकी अज्ञाताने फोनवरुन दिली होती.