गुन्हे शाखा घटक–२ भिवंडीची धडक; ७.३९ लाखांचे दागिने जप्त, घरफोडी व वाहनचोरीचे सहा गुन्हे उघड
पोलीस महानगर नेटवर्क
भिवंडी : भिवंडी शहर व परिसरात वाढत्या घरफोडी व वाहनचोरीच्या घटनांना आळा घालण्यात गुन्हे शाखा, घटक २ भिवंडी यांना मोठे यश मिळाले आहे. गुप्त माहिती व तांत्रिक विश्लेषणाच्या आधारे कारवाई करत पोलिसांनी एका आरोपीला अटक केली असून, त्याच्याकडून तब्बल ७ लाख ३९ हजार ४०० रुपये किमतीचे सोने-चांदीचे दागिने हस्तगत करण्यात आले आहेत. या कारवाईत घरफोडी व वाहनचोरीचे एकूण सहा गुन्हे उघडकीस आले आहेत.
पोलिसांकडून मिळालेल्या माहितीनुसार, भिवंडी परिसरात घडलेल्या सलग चोरीच्या घटनांचा समांतर तपास सुरू असताना गुन्हे शाखा घटक–२ ने तांत्रिक विश्लेषणाचा आधार घेत संशयिताच्या हालचालींवर लक्ष ठेवले. प्राप्त माहितीची खातरजमा केल्यानंतर सापळा रचून आरोपीला ताब्यात घेण्यात आले.
चौकशीत आरोपीने विविध ठिकाणी घरफोडी करून तसेच वाहने चोरून मौल्यवान दागिन्यांची चोरी केल्याची कबुली दिली. त्यानंतर पोलिसांनी आरोपीच्या ताब्यातून चोरीचा मुद्देमाल हस्तगत केला. या कारवाईमुळे भिवंडी शहर व ग्रामीण भागात घडलेल्या सहा गुन्ह्यांची उकल झाली आहे.
ही कारवाई वरिष्ठ अधिकाऱ्यांच्या मार्गदर्शनाखाली गुन्हे शाखा घटक–२ च्या पथकाने अत्यंत नियोजनबद्ध आणि वेगवान पद्धतीने पार पाडली. या यशस्वी कारवाईमुळे परिसरातील नागरिकांमध्ये समाधान व्यक्त होत असून, गुन्हेगारांमध्ये मात्र पोलिसांचा धाक वाढला आहे.
भिवंडी पोलिसांकडून पुढील तपास सुरू असून, आरोपीकडून आणखी गुन्ह्यांची उकल होण्याची शक्यता वर्तविण्यात येत आहे. तसेच नागरिकांनी संशयास्पद हालचाली आढळल्यास तात्काळ पोलिसांना माहिती द्यावी, असे आवाहनही करण्यात आले आहे.