नालासोपाऱ्यातील महेश पार्क मधील एका इमारतीच्या बंद खोलीत ३० वर्षाच्या हिरेनचा शेवट; हत्या की आत्महत्येचा तपास सुरु
योगेश पांडे / वार्ताहर
नालासोपारा – नालासोपाऱ्यातील महेश पार्क परिसरातील एका इमारतीत मंगळवारी एक धक्कादायक घटना उघडकीस आली. बंद घरात खोलीत घडलेल्या या घटनेने परिसरात खळबळ उडाली.
मिळालेल्या माहितीनुसार, नालासोपाऱ्यातील महेश पार्क या परिसरात हिरेन महेंद्र चित्तौडा हा व्यक्ती एकटाच राहतो. मात्र काही दिवसांपासून तो बाहेर दिसत नव्हता शिवाय त्याच्या असण्याचा कोणालाही काही पत्ता लागत नव्हता. या सर्व कारणामुळे शेजाऱ्यांना शंका येऊ लागली होती.
हिरेन बऱ्याच दिवसांपासून दिसत नव्हता त्यामुळे शेजाऱ्यांच्या मनात शंका होती त्यानंतर मंगळवारी त्याच्या घरातून तीव्र दुर्गंधी येऊ लागल्याने रहिवाशांचा संशय अधिकच वाढला. त्यामुळेच शेजारच्यांनी तातडीने हिरेनच्या बहिणीशी सर्व प्रकार कळवला शिवाय परिसरातील सामाजिक कार्यकर्ते स्वप्निल बांदेकर यांनाही याबाबत सांगण्यात आले.
घटनेची माहिती मिळताच तुळींज पोलिसांनी तात्काळ घटनास्थळी धाव घेतली. सर्व उपस्थित झाल्यानंतर घराचा दरवाजा उघडण्यात आला आणि समोर भीषण दृश्य पाहायला मिळाले. हिरेनचा मृतदेह रक्ताच्या थारोळ्यात पडलेल्या अवस्थेत आढळून आला. पोलिसांनी पंचनामा करून मृतदेह ताब्यात घेतला आणि पुढील तपासासाठी शवविच्छेदनासाठी पाठवला.
हिरेनचा मृत्यू नेमका कशामुळे झाला हे अद्याप स्पष्ट झालेले नाही. आत्महत्या, अपघात की अन्य काही कारण आहे का याचा तपास पोलिसांकडून सुरू आहे. या घटनेमुळे महेश पार्क परिसरात भीतीचे वातावरण निर्माण झाले असून नागरिकांमध्ये विविध चर्चा सुरू आहेत. तुळींज पोलीस अधिक तपास करत आहेत.