६ हजारांची सुपारी देऊन जावयाचा खून; सासू-मेहुण्यासह पाच जण अटकेत
पोलीस महानगर नेटवर्क
भंडारा : जिल्ह्यातील मोहाडी तालुक्यातील बेटाळा गावात आंतरजातीय प्रेमविवाहाचा राग मनात धरून अवघ्या सहा हजार रुपयांची सुपारी देत जावयाची हत्या केल्याचा धक्कादायक प्रकार उघडकीस आला आहे. या प्रकरणात मृतकाची सासू, मेहुणा आणि सुपारी घेऊन हत्या करणाऱ्या तिघांसह पाच जणांना अटक करण्यात आली आहे.
आकाश शेंडे (वय २४) असे हत्या झालेल्या तरुणाचे नाव आहे. आकाशने दोन महिन्यांपूर्वी गावातीलच तरुणीशी कुटुंबीयांचा विरोध झुगारून आंतरजातीय प्रेमविवाह केला होता. विवाहानंतर नवदांपत्य बेटाळा गावात वास्तव्यास होते. मात्र, मुलीची आई अंजू कुंभलकर (४३) आणि भाऊ चेतन कुंभलकर (२३) यांना हा विवाह मान्य नव्हता. या रागातून त्यांनी आकाशचा काटा काढण्याचा कट रचत सहा हजार रुपयांची सुपारी दिल्याचे तपासात निष्पन्न झाले आहे.
हत्येनंतर आकाशचा मृतदेह गावालगतच्या नाल्यात फेकून आत्महत्या असल्याचा बनाव करण्यात आला. मात्र, संशयास्पद परिस्थिती लक्षात घेऊन मोहाडी पोलिसांनी सखोल चौकशी केली असता ही आत्महत्या नसून नियोजित हत्या असल्याचे उघड झाले.
या प्रकरणी सासू अंजू कुंभलकर, मेहुणा चेतन कुंभलकर यांच्यासह भारत मोहतुरे (२६), महेंद्र बोरकर (३१) आणि दिनेश उर्फ सचिन मोहन ईश्वरकर (३७) यांना अटक करण्यात आली आहे. घटनेचा पुढील तपास मोहाडी पोलीस करीत आहेत.