पुण्यातील रामेश्वरम् कॅफेच्या मालकाच्या घरात चोरी; दुधवाल्यानेच मारला डल्ला
योगेश पांडे / वार्ताहर
पुणे – पुण्यातील विमाननगर परिसरात प्रसिद्ध रामेश्वरम् कॅफेच्या मालकाच्या घरात चोरी झाल्याची धक्कादायक घटना उघडकीस आली असून, या प्रकरणात घरात नियमितपणे दूध टाकण्यासाठी येणाऱ्या दुधवाल्यानेच चोरी केल्याचे स्पष्ट झाले आहे. व्यंकटेश करंडे असे अटक करण्यात आलेल्या आरोपीचे नाव आहे. या चोरीप्रकरणी विमाननगर पोलिसांनी आरोपीला अटक केली असून, त्याच्याकडून १ लाख ३२ हजार रुपयांची रोकड चोरीला गेल्याचे निष्पन्न झाले आहे.
मिळालेल्या माहितीनुसार, रामेश्वरम् कॅफेच्या मालकाच्या घराला डिजिटल लॉक बसवण्यात आले आहे. आरोपी व्यंकटेश करंडे हा गेल्या अनेक दिवसांपासून या घरावर पाळत ठेवून होता. घरात दूध टाकण्यासाठी येताना तो वारंवार डिजिटल लॉकचा पासवर्ड टाकून पाहत असल्याचे तपासात उघड झाले आहे. मात्र प्रत्येकवेळी त्याचा प्रयत्न फसत होता.
अखेर १७ सप्टेंबर रोजी पहाटे साडेपाचच्या सुमारास आरोपीला डिजिटल लॉकचा अचूक पासवर्ड समजला. त्यानंतर त्याने घरात प्रवेश करून कपाटातील १ लाख ३२ हजार रुपयांची रोकड लंपास केली. चोरीनंतर तो तेथून पसार झाला. दरम्यान, घरातील सीसीटीव्ही कॅमेऱ्यांमध्ये ही संपूर्ण घटना कैद झाली असून, त्याच आधारे पोलिसांनी तपासाची चक्रे फिरवली.
सीसीटीव्ही फुटेजच्या मदतीने आरोपीची ओळख पटवून विमाननगर पोलिसांनी त्याला अटक केली. या घटनेमुळे परिसरात एकच खळबळ उडाली असून, घरात विश्वासाने येणाऱ्या व्यक्तीकडूनच चोरी झाल्याने नागरिकांमध्ये चिंतेचे वातावरण आहे. याप्रकरणी विमाननगर पोलीस पुढील तपास करत आहेत.