खोट्या गुन्ह्याचा कट फोडला; विनयभंग प्रकरणाचा सूड घेण्यासाठी रचला होता बनाव, सहा जणांना अटक
पोलीस महानगर नेटवर्क
अंबरनाथ – विनयभंगाच्या गुन्ह्यात अडकवल्याचा राग मनात धरून, पीडितेच्या वडील आणि भावाविरुद्ध बनावट खुनाच्या प्रयत्नाचा खोटा गुन्हा दाखल करण्यात आल्याचा धक्कादायक प्रकार अंबरनाथमध्ये उघडकीस आला आहे. या कटाचा अंबरनाथ पोलिसांनी पर्दाफाश केला असून, मुख्य आरोपीसह सहा जणांविरोधात गुन्हा दाखल करून त्यांना अटक करण्यात आली आहे. या घटनेमुळे अंबरनाथमध्ये एकच खळबळ उडाली आहे.
दोन वर्षांपूर्वीचा आहे विनयभंगाचा गुन्हा
अंबरनाथच्या जावसई भागात राहणाऱ्या आकाश अमरजित गुप्ता याच्यावर दोन वर्षांपूर्वी सोनल जैस्वार हिने विनयभंगाचा गुन्हा दाखल केला होता. या गुन्ह्याचा बदला घेण्यासाठी आकाश गुप्ताने एक विकृत कट रचला. सोनलचे वडील नागेंद्र जैस्वार आणि भाऊ आदित्य जैस्वार यांना खोट्या गुन्ह्यात अडकवण्यासाठी त्याने आपल्या मित्रमंडळींच्या मदतीने बनाव केला.
खुनाच्या प्रयत्नाचा बनाव
या कटात आकाशचा भाऊ कन्हैय्या गुप्ता, सिद्धार्थ गायकवाड, मोनू कश्यप, आदित्य जैस्वार आणि अजित चौहान हे सहभागी होते. कन्हैय्याने कटासाठी वस्तरा आणला, तर मोनू आणि आदित्यने ब्लेड घेऊन आले. सिद्धार्थ गायकवाड याने स्वतःच्याच मित्र अजित चौहानवर हल्ला केला. नंतर मोनू आणि आदित्यने अजितला सेंट्रल हॉस्पिटलमध्ये दाखल करून, त्याच्यावर खोटा आरोप लावण्याचा डाव आखला.
पोलिसांचा सखोल तपास
जखमी अजित चौहानने पोलिसांना दिलेल्या जबाबात नागेंद्र आणि आदित्य जैस्वार यांनी आपल्यावर हल्ला केल्याचा आरोप केला. त्यानुसार पोलिसांनी त्यांच्याविरुद्ध हत्येच्या प्रयत्नाचा गुन्हा दाखल केला. मात्र तपासादरम्यान, गुन्हा घडला त्या वेळी हे दोघे घटनास्थळी नव्हते, हे पोलिसांच्या तांत्रिक तपासात निष्पन्न झाले. यामुळे पोलिसांचा संशय बळावला.
कटाची संपूर्ण उकल
वरिष्ठ पोलीस निरीक्षक शब्बीर सय्यद आणि डीबी पथकाचे एपीआय विजय काजारी यांच्या नेतृत्वाखाली केलेल्या तपासात हा संपूर्ण कट उघडकीस आला. त्यानंतर पोलिसांनी स्वतःहून (सुमोटो) गुन्हा दाखल करून आकाश गुप्ता, कन्हैय्या गुप्ता, सिद्धार्थ गायकवाड, मोनू कश्यप, आदित्य जैस्वार आणि अजित चौहान यांना अटक केली. त्यांच्याविरुद्ध खोटा गुन्हा रचणे, खोटी माहिती देणे आणि कट रचणे या गंभीर कलमांतर्गत कारवाई करण्यात आली आहे.
पोलीस उपायुक्त सचिन गोरे यांनी दिलेल्या माहितीनुसार, पोलिसांची सतर्कता आणि तांत्रिक तपासामुळे एक मोठा अन्याय टळला असून, या प्रकारामुळे गुन्हेगारीला दिला जाणारा वैयक्तिक सूडाचा नवा चेहरा समोर आल्याचे दिसते.