परदेशी नागरिकाकडून २.१२ कोटींचा मेफेड्रॉन जप्त; मानपाडा पोलिसांची यशस्वी कारवाई
पोलीस महानगर नेटवर्क
डोंबिवली – मानपाडा पोलीस ठाण्याच्या पथकाने निळजे गाव परिसरात सापळा रचून एका परदेशी नागरिकाला अटक करत तब्बल १.५१ किलो मेफेड्रॉन (एमडी) हा अंमली पदार्थ जप्त केला असून, याची किंमत २.१२ कोटी रुपये असल्याची माहिती आहे. गुन्हा गु.र.नं. ७८७/२०२५, अंमली पदार्थ प्रतिबंधक कायदा १९८५ अंतर्गत कलम ८ (क), २१ (क), २२ (क) आणि परकीय नागरिक कायदा कलम १४ (अ), (ब) अन्वये नोंदवण्यात आला आहे. दिनांक ०७ जुलै २०२५ रोजी रात्री १०:५० वाजता, मानपाडा पोलिसांनी मिळालेल्या गुप्त माहितीनुसार निळजे गाव येथील तलावाजवळील सार्वजनिक रस्त्यावर कारवाई केली. त्यावेळी आरोपी इसा बकायोका (वय ३७ वर्षे, मूळ रहिवासी, आएवरी कोस्ट, सध्या – निळजे गाव) याला ताब्यात घेण्यात आले.
त्याच्याकडून १.५१ किलो मेफेड्रॉन (एमडी) हा अत्यंत घातक अंमली पदार्थ जप्त करण्यात आला असून, याची बाजारातील एकूण किंमत २.१२ कोटी रुपये असल्याचे सांगण्यात आले. यापूर्वी दिनांक २७ जून २०२५ रोजीही मानपाडा पोलिसांनी गु.र.नं. ७३१/२०२५ अन्वये सव्वा दोन कोटी रुपये किमतीचा मेफेड्रॉन पकडला होता. या प्रकरणातील मुख्य आरोपी फरहान उर्फ मोहम्मद राहीब सलीम शेख याच्याकडून बेंगळुरूहून चोरलेली गाडी व त्यातील एमडी जप्त करण्यात आला होता.
सदरची धडक कारवाई मा. पोलीस आयुक्त आशुतोष डुंबरे, सहआयुक्त ज्ञानेश्वर चव्हाण, अप्पर पोलीस आयुक्त संजय जाधव, उप आयुक्त अतुल झेंडे, सहाय्यक आयुक्त सुहास हेमाडे यांच्या मार्गदर्शनाखाली करण्यात आली. कारवाईसाठी वरिष्ठ पोलीस निरीक्षक संदिपान शिंदे, पोलीस निरीक्षक दत्तात्रय गुंड, सपोनि सागर चव्हाण, सपोनि अजय कुंभार तसेच पोलीस पथकातील पोहवा पाटील, माळी, राठोड, पोशि आडे, गरूड, झांझुर्णे, चौधर इत्यादींनी मोलाचे योगदान दिले.
नागरिकांना आवाहन :
अमली पदार्थांबाबत काहीही गोपनीय माहिती असल्यास अमली पदार्थ विरोधी कक्ष, कल्याण किंवा मानपाडा पोलीस ठाणे (फोन : ०२५१-२४७०१०४) यांच्याशी संपर्क साधावा. माहिती देणाऱ्याचे नाव गोपनीय ठेवले जाईल. ही कारवाई अंमली पदार्थ विरोधातील लढ्यात एक मोठं यश मानली जात असून, परदेशातून चालणाऱ्या ड्रग्स नेटवर्कला मोठा धक्का दिला गेला आहे.