कासा जवळ एसटी बस अपघात: १४ प्रवासी जखमी, दोन महिलांची प्रकृती चिंताजनक
पोलीस महानगर नेटवर्क
डहाणू आगारातून छत्रपती संभाजीनगरकडे निघालेल्या एसटी बसचा मंगळवार, १ जुलै रोजी सकाळी ९.४५ वाजता कासा-जव्हार मार्गावरील कवडास येथील तीव्र वळणावर भीषण अपघात झाला. बस चालकाचे वाहनावरील नियंत्रण सुटल्याने बस रस्त्याच्या कडेला कलंडली. या अपघातात १४ प्रवासी जखमी झाले असून, त्यापैकी दोन महिलांची प्रकृती गंभीर आहे.
डहाणूहून सकाळी ८ वाजता निघालेली ही बस कवडासजवळ आली असता, एका तीव्र वळणावर चालकाचे नियंत्रण सुटले आणि बस डाव्या बाजूला झुकून रस्त्याच्या खाली गेली. अपघाताची तीव्रता पाहता बसमधील प्रवाशांमध्ये एकच खळबळ उडाली. मात्र, चालक आणि वाहक यांच्या सतर्कतेमुळे त्यांनी प्रवाश्यांना आपत्कालीन मार्गाने बाहेर काढले.
जखमी झालेल्यांना तातडीने कासा उपजिल्हा रुग्णालयात दाखल करण्यात आले आहे. गंभीर जखमींमध्ये लक्ष्मी ओझरे (वय ६५) आणि शोभा मेंडगे (वय ६५) या दोन महिला प्रवाशांचा समावेश आहे. बसमध्ये एकूण २८ प्रवासी होते.
दरम्यान, घटनास्थळी पोलीस आणि स्थानिक नागरिकांनी मदतकार्य हाती घेतले. अपघातग्रस्त प्रवाश्यांना पुढील प्रवासासाठी दुसरी एसटी बस पाठवण्यात येणार असल्याचे चालक व वाहकांनी सांगितले.