फेरीवाल्यांवर कारवाई करण्यासाठी गेलेल्या केडीएमसी अधिकाऱ्यास धक्काबुक्की करणाऱ्या व्यक्तीवर गुन्हा दाखल
पोलीस महानगर नेटवर्क
कल्याण – कल्याण पश्चिम येथील छत्रपती शिवाजी महाराज चौकातून कल्याण रेल्वे स्थानकाकडे जाणारा रस्ता नेहमीच गर्दीने गजबजलेला असतो. या रस्त्यावरून जाणाऱ्या पादचाऱ्यांना, नागरिकांना चालणे अथवा आपल्या वाहनाने रेल्वे स्थानक गाठणे सुलभ व्हावे याकरिता सदर वर्दळीच्या रस्त्यावरील फेरीवाल्यांवर महापालिकेच्या क प्रभागाचे फेरीवाला पथक सातत्याने कारवाई करीत असते.
शुक्रवारी सायंकाळी देखील हा रस्ता वाहतुकीला मोकळा राहण्याच्या दृष्टिकोनातून क प्रभागाचे सहाय्यक आयुक्त धनंजय थोरात आणि त्यांच्या पथकाने या रस्त्यावरील फेरीवाल्यांविरोधात कारवाई सुरुवात केली असता तेथील फेरीवाल्यांनी सहाय्यक आयुक्त धनंजय थोरात आणि त्यांच्या फेरीवाला कारवाई पथकातील कर्मचारी वर्गास धक्काबुक्की आणि शिवीगाळ देखील केल्याने सरकारी कामात अडथळा निर्माण केल्यामुळे संबंधित फेरीवाल्यांविरोधात अ प्रभागाचे सहाय्यक आयुक्त धनंजय थोरात यांनी महात्मा फुले चौक पोलीस स्थानकात गुन्हा दाखल केला आहे.
याप्रकरणी महात्मा फुले चौक पोलीस अधिक तपास करीत आहेत.