जयदीप आपटे घरी येणार असल्याची बायकोने दिली पोलिसांना टीप; पोलीसांनी केली अटक
योगेश पांडे / वार्ताहर
कल्याण – राजकोट येथील छत्रपती शिवाजी महाराज यांचा पूर्णाकृती पुतळा कोसळून झालेल्या अपघात प्रकरणी गुन्हा दाखल करण्यात आलेला ३९ वर्षीय शिल्पकार जयदीप आपटे याला अखेर अटक करण्यात आली आहे. जयदीपला कल्याण येथील राहत्या घराजवळून बेड्या ठोकण्यात आल्या. त्याचा ताबा सिंधुदुर्ग पोलिसांनी घेतला असून गुरुवारी दुपारी तीन वाजता मालवण कोर्टात त्याला हजर करण्यात आले.आता जयदीपने शरणागती पत्करली की कुटुंबाची भेट घेण्यासाठी आला असताना त्याला पोलिसांनी पकडलं, यावरुन दावे-प्रतिदावे सुरु आहेत. कुटुंबीय आणि मित्रांनी जयदीप आपटेला सरेंडर करण्यास वारंवार सांगितलं होतं, परंतु तो तयार नव्हता. बुधवारी रात्री तो कल्याण येथील घरी कुटुंबीयांच्या भेटीसाठी येत असताना त्याला अटक करण्यात आली, असं बोललं जात आहे. जयदीपचं वर्कशॉप त्याच्या घराजवळच आहे. या परिसरातच बुधवारी रात्री त्याला ताब्यात घेण्यात आलं. सिंधुदुर्ग आणि ठाणे पोलिसांचे पथक जयदीप आपटेच्या मागावर होतं.
पोलीस सूत्रांनी दिलेल्या माहितीनुसार, जयदीप आणि त्याचा एक मित्र १० दिवसांपूर्वी मालवणला पुतळा उभारलेल्या जागेला भेट देण्यासाठी निघाले होते. हेच त्याचं शेवटचं ‘ज्ञात’ लोकेशन होतं. पोलिसांनी दिलेल्या माहितीनुसार, जयदीप आपटेने पत्नी निशिगंधाशी संपर्क साधून घरी परत येत असल्याची माहिती दिली होती. तिनेच ही माहिती पोलिसांना दिली. पोलिसातील सूत्रांच्या माहितीनुसार त्याचे कुटुंबीय चिंतेत होते. जयदीपने घरी परत यावे आणि तपासात सहकार्य करावे, अशी त्यांची इच्छा होती.