पेड दर्शन प्रकरणी शिवसेना शिंदेंच्या पदाधिकाऱ्यावर गुन्हा दाखल, तर मंदिरातील दोन सुरक्षा रक्षक निलंबित
पोलीस महानगर नेटवर्क
पंढरपूर – पंढरपूरमध्ये नुकतीच आषाढी यात्रा पार पडली. आषाढी यात्रेदरम्यान व्हीआयपी दर्शनाची सुविधा बंद करण्यात आली होती. तरी देखील भाविकांकडून चार हजार रुपये घेऊन विठ्ठलाचे पेड दर्शन देण्यात आल्याचे समोर आले आहे. या प्रकरणी शिवसेना शिंदे गटाच्या पदाधिकाऱ्या विरोधात पंढरपूर शहर पोलीस ठाण्यात गुन्हा दाखल करण्यात आला आहे. तर मंदिरातील दोन सुरक्षा रक्षकांवर निलंबनाची कारवाई करण्यात आली आहे.
नुकत्याच पार पडलेल्या पंढरपूरच्या आषाढी यात्रेनिमित्ताने लाखोंच्या संख्येने भाविक दर्शनासाठी येत असतात. सदर गर्दी लक्षात घेता मंदिरातील व्हीआयपी दर्शन सुविधा बंद करण्यात आली होती. मात्र, या दरम्यान ठाणे जिल्ह्यातील चेतन काबाडे या भाविकांकडून सुमित शिंदे या एजंटाने चार हजार रुपये घेऊन व्हीआयपी दर्शन दिल्याचा प्रकार समोर आला आहे. याप्रकरणी स्वतः भाविकाने पोलीस ठाण्यात तक्रार दिली आहे.
भाविकाच्या तक्रारीवरून संशयित आरोपी सुमित शिंदे यांच्या विरोधात फसवणुकीचा गुन्हा दाखल करण्यात आला आहे. सुमीत शिंदे हा शिंदे सेनेचा पंढरपूर शहर पदाधिकारी आहे. या पेड दर्शन दिल्याप्रकरणी मंदिरातील दोन खासगी सुरक्षा रक्षकांचा सहभाग असल्याचे तपासामध्ये समोर आले आहे. यावरून मंदिर समितीने देखील मोठी कारवाई केली आहे. या कारवाईत मंदिरातील अभिजीत मंडले आणि शुभम मेटकरी या दोन सुरक्षा रक्षकांवर निलंबनाची कारवाई करण्यात आली आहे. तसेच सुरक्षा रक्षक पुरवणाऱ्या रक्षक एजन्सीला सदरच्या कारवाईची नोटीस पाठविण्यात आली असून दोषींवर कडक कारवाई करण्याचे पोलिसांना सूचना दिल्याबाबतची माहिती मंदिर समितीचे मुख्य कार्यकारी अधिकारी राजेंद्र शेळके यांनी दिली आहे.