पुण्यात पुन्हा हिट अँड रन, मद्यधुंद कारचालकाने महिलेला उडवून ६ वाहनांना धडक; पलायन करताना जमावाने पकडले
योगेश पांडे / वार्ताहर
पुणे – पुण्यामध्ये दिवसेंदिवस हिट अँड रनच्या घटनांमध्ये वाढ होत आहे. पिंपरी गावात एका कारचालकाने पायी जाणाऱ्या महिलेला उडवलं होतं. त्यानंतर मंगळवारी रात्रीच कोथरूड परिसरामध्ये बसने वाहनांना धडक दिली. ही घटना ताजी असतानाच आता पुण्यातील नांदेड सिटी परिसरामध्ये पुन्हा एकदा हिट अँड रनची घटना घडली आहे. येथे एका मद्यधुंद अवस्थेत असलेल्या कार चालकाने महिलेला जोरदार धडक दिली. त्यानंतर त्याने घटनास्थळावरुन पळून जाण्याच्या प्रयत्न केला. मात्र, स्थानिक नागरिकांनी कार चालकाला पकडले आहे.बुधवारी सकाळी साडेदहा ते अकराच्या सुमारास ही घटना घडल्याची माहिती आहे.यावेळी पळून जाण्याच्या प्रयत्न करत असलेल्या कारचालकाने आणखी पाच दुचाकींना धडक दिली. त्यानंतर त्याने विजेच्या खांबाला धडक दिली ज्यामध्ये विजेचा खांब देखील पडला. स्थानिक नागरिकांनी पकडून या नागरिकाला हवेली पोलिसांच्या स्वाधीन केले.
नांदेड सिटी परिसरामध्ये रस्त्यावरुन जाणाऱ्या एका महिलेला या मद्यधुंद चालकाने जोरदार धडक दिली. महिलेला जोरात धडक दिल्यानंतर हा मद्यधुंद कारचालक पळून जाण्याचा प्रयत्न करत होता. मात्र, पळून जाण्याचा प्रयत्न करत असाताना त्याने आपल्या कारने रस्त्याच्या कडेला उभ्या असलेल्या सहा ते सात गाड्यांना उडवले. तसेच, त्याने पुढे जाऊन विजेच्या खांबांना देखील धडक दिली. या घटनेमुळे स्थानिक नागरिकांनी घटनास्थळी एकच गर्दी केली होती. प्रसंगावधान राखून या नागरिकांनी वाहन चालकाला पकडल्याने नागरिकांचे कौतुक करण्यात येत आहे. ज्या महिलेला या कारचालकाने उडवलं, ती महिला गंभीर जखमी झाली असून तिच्यावर जवळच्या रुग्णालयात उपचार सुरू आहेत. ही घटना घडल्यानंतर पोलिसांनी घटनास्थळी येण्यासाठी उशीर केल्याचे स्थानिक नागरिकांचे म्हणणे आहे. अशा घटना घडल्यानंतर पोलिसांनी घटनास्थळी तातडीने धाव घेणे गरजेचे आहे. मात्र, पोलीस तात्काळ घटनास्थळी न पोहोचल्याने स्थानिक नागरिकांकडून संताप व्यक्त करण्यात येत आहे. या प्रकरणाचा अधिक तपास हवेली पोलिसांकडून केला जात आहे.