व्यवसायात तोटा झाल्याने मुंबईतील प्रसिद्ध हिरा व्यापाऱ्याने भर समुद्रात उडी मारून संपवलं जीवन
योगेश पांडे / वार्ताहर
मुंबई – गेल्या काही दिवसांपासून मुंबईत आत्महत्येच्या घटनांमध्ये सातत्याने वाढ होत आहे. काही दिवसांपूर्वी मुंबईतील वरळी सी-लिंकवरुन एका व्यापाराने आत्महत्या केल्याची घटना समोर आली होती. त्यानंतर एका तरुणीने मरीन ड्राईव्हच्या समुद्रात उडी मारुन आत्महत्या केल्याची घटना घडली होती. आता रविवारी २१ जुलै रोजी एका हिरा व्यापाऱ्याने गेट वे ऑफ इंडियाजवळील समुद्रात उडी मारुन जीवन संपवल्याची घटना समोर आली आहे. व्यवसायात तोटा झाल्याने त्याने हे पाऊल उचलल्याची माहिती समोर येत आहे. मिळालेल्या माहितीनुसार, रविवारी एका हिरा व्यापाऱ्याने गेट वे ऑफ इंडियाजवळील समुद्रात उडी मारुन आत्महत्या केली. संजय शहा – ६५ असे या व्यापाऱ्याचे नाव आहे. संजय हा हिरा व्यापारी होता. व्यवसायात तोटा झाल्याने त्यांनी हे पाऊल उचलल्याचा प्राथमिक अंदाज व्यक्त केला जात आहे. पण अद्याप याबद्दलची अधिकृत माहिती समोर आलेली नाही.
या घटनेनंतर पोलिसांनी अपघाती मृत्यूची नोंद करत तपास सुरू केला आहे. तसेच या घटनेनंतर खबरदारी म्हणून पोलिसांकडून आज मरीन ड्राईव्ह परिसरात बॅरिकेट्स लावण्यात आले आहेत. काही दिवसांपासून वारंवार आत्महत्या होत असल्याने पोलिसांकडून या परिसरातील गस्त वाढवण्यात आली आहे.