बहुजन विकास आघाडीचे नेते प्रशांत राऊत यांना बवीआ कार्यकर्त्यांकडून मारहाण; विरार पोलीस ठाण्यात गुन्हा दाखल
योगेश पांडे / वार्ताहर
विरार – विरार येथे बहुजन विकास आघाडीच्याच कार्यकर्त्यांनी त्यांच्याच बहुजन विकास आघाडी पक्षातील नेते प्रशांत राऊत यांना मारहाण केल्याची घटना घडली आहे. राऊत यांच्या राहत्या घरातील इमारतीखाली ही मारहाण करण्यात आली असून घटना मोबाईल कॅमेऱ्यात देखील कैद झाली आहे. या मारहाण प्रकरणात रमाकांत उर्फ सोन्या पाटील, इम्तियाज शेख व २० ते २५ अन्य आरोपींविरोधात गुन्हा दाखल करण्यात आला आहे. विरार पूर्वेकडे पाम टॉवर इमारतीत बहुजन विकास आघाडी पक्षाचे नेते माजी स्थायी समिती सभापती प्रशांत राऊत राहतात. बहुजन विकास आघाडी पक्षातीलच कार्यकर्ते रमाकांत उर्फ सोन्या पाटील यांनी प्रशांत राऊत यांना फोन केला. ”तुमच्याशी काही बोलायचे आहे”, असं सांगून राऊत यांना त्यांच्या राहत्या घराच्या इमारतीखाली बोलावले. प्रशांत राऊत इमारतीखाली गेल्यानंतर रमाकांत पाटील २० ते २५ जणांच्या जमावसह इमारतीखाली दाखल झाले आणि प्रशांत राऊत राऊत यांना ठोश्या बुक्यांनी मारहाण केली. काल शुक्रवारी रात्री साडेअकरा वाजेच्या सुमारास ही घटना घडली असून मारहाणीचा व्हिडिओ इमारतीतील नागरिकांच्या मोबाईल कॅमेऱ्यात कैद झाला आहे.
मारहाण झाल्यानंतर प्रशांत पाटील यांनी रमाकांत उर्फ सोन्या पाटील आणि इतर २०-२५ जणांविरोधात विरार पोलीस ठाण्यात तक्रार दाखल केली. या मारहाण प्रकरणी विरार पोलीस ठाण्यात रमाकांत उर्फ सोन्या पाटील इम्तियाज शेख आणि अन्य २० ते २५ जणांवर गुन्हा दाखल करण्यात आला आहे. या प्रकरणात गुन्हा दाखल करण्यात आलेले रमाकांत उर्फ सोन्या पाटील यांची पत्नी माजी नगरसेविका असून बहुजन विकास आघाडी पक्षातील कार्यकर्त्यांच्या अंतर्गत वादातून ही मारहाण झाली असल्याचे कळते. मात्र हल्ल्या मागचे नेमके कारण अद्यापही स्पष्ट झालेले नाही. या प्रकरणी अधिक तपास विरार पोलीस करत आहेत.