शिक्षकीपेशाला काळिमा ! लाच स्वीकारताना पुणे विद्यापीठातील प्राध्यापिका लाचलुचपत प्रतिबंधक विभागाच्या जाळ्यात
पोलीस महानगर नेटवर्क
पुणे – पीएचडी डिग्रीसाठी तयार केलेले प्रबंध रिजेक्ट करण्यासाठी व सुधारणा करुन पुन्हा सादर करणे व त्यावर अप्रुव्हल देण्यासाठी २० हजार रुपये लाच स्वीकारताना पुणे विद्यापीठातील अर्थशास्त्राच्या प्राध्यापीका डॉ. शकुंतला निवृत्ती माने (वय-५९) यांना पुणे लाचलुचपत प्रतिबंधक विभागाने रंगेहाथ पकडले. या कारवाईमुळे शिक्षण क्षेत्रात एकच खळबळ उडाली आहे. लाचलुचपत प्रतिबंधक विभागाने शनिवारी उशिरा ही कारवाई सांगवी येथील बाबुरावजी घोलप महाविद्यालयातील अर्थशास्त्र विभाग प्रमुख्याच्या कार्य़ालयात केली.
लाचलुचपत प्रतिबंधक विभागाचे सहायक पोलीस आयुक्त नितीन जाधव यांनी दिलेल्या माहितीनुसार, तक्रारदार ४० वर्षीय व्यक्ती प्राध्यापक असून त्यांनी अर्थशास्त्र विषयामध्ये पीएचडी डीग्री प्राप्त करून घेण्यासाठी सावित्रीबाई फुले पुणे विद्यापीठाकरीता ऑनलाइन प्रबंध तयार केलेला आहे. हा प्रबंध विद्यापीठाकडे सादर करण्यासाठी तक्रारदार प्राध्यापकांचे मार्गदर्शक (गाईड) म्हणून डाॅ. शकुंतला माने यांची विद्यापीठाकडून नियुक्ती झालेली आहे. तक्रारदार प्राध्यापकाने सादर केलेला प्रबंध रिजेक्ट करण्यासाठी व सुधारणा करून पुन्हा सादर करणे व त्यावर अप्रुव्हल देणे यासाठी डाॅ. शकुंतला माने हिने तक्रारदार प्राध्यापकाकडे २५ हजार रुपयांची लाच मागितली. तक्रारदार प्राध्यापकाने याबाबत पुणे लाचलुचपत प्रतिबंधक विभागाकडे तक्रार केली. त्यानुसार लाचलुचपत प्रतिबंधक विभागाने पडताळणी केली असता, डाॅ. माने हिने लाच मागितल्याचे समोर आले. लाचेच्या २५ हजारांपैकी पहिला हप्ता म्हणून २० हजार रुपये लाच स्वीकारल्यावर डाॅ. माने हिला ताब्यात घेण्यात आले. याप्रकरणी सांगवी पोलिस ठाण्यात गुन्हा दाखल करण्यात आला असून लाचलुचपत प्रतिबंधक विभागाचे पोलीस उपअधीक्षक सुदाम पाचोरकर तपास करीत आहेत.
सदरची कारवाई पोलीस उपअधीक्षक सुदाम पाचोरकर, सहाय्यक फौजदार मुकुंद अयाचित ,पोलिस अंमलदार चेतन कुंभार, महिला पोलिस अंमलदार पूनम पवार, चालक पोलिस अंमलदार माळी या सर्वांनी अमोल तांबे पोलिस अधीक्षक, डॉ. शीतल जानवे वरिष्ठ पोलिस अधीक्षक यांच्या मार्गदर्शनाखाली करण्यात आली.