कल्याण आडीवली परिसरात निर्घृणपणे खून करून मृतदेहाच्या कमरेला दगड बांधून फेकला विहिरीत ; पत्नीसह प्रियकराला बेड्या
चार महिन्यांपूर्वी रचला होता कट ; महिलेने प्रियकराच्या मदतीने काढला पतीचा काटा
मानपाडा पोलिसांनी २४ तासात केला हत्येचा उलगडा
प्रकाश संकपाळ
डोंबिवली – महिलेने आपल्या प्रियकराच्या मदतीने कट रचून पतीची निर्घृण हत्या केली. कुणाला संशय येऊ नये म्हणून त्याचा मृतदेह परिसरातील एका विहिरीत दगड बांधून फेकून दिला होता. कल्याण जवळील आडीवली परिसरात ही घटना उघडकीस आणण्यास मानपाडा पोलिसांना यश आले आहे. चंद्रप्रकाश लोवंशी असे या मयत इसमाचे नाव असून मानपाडा पोलिसांनी या प्रकरणी तपास करून पत्नी रीता लोवंशी व तिचा प्रियकर सुमित विश्वकर्मा या दोघांनाही बेड्या ठोकल्या आहेत.दोघांच्या प्रेमातला अडसर दूर करण्यासाठी रिता व सुमितने चार महिन्यांपासून योजना आखली होती आपल्यावर कुणाचा संशय येऊ नये म्हणून रिताने काही दिवसांपूर्वीच चंद्रप्रकाश बेपत्ता असल्याची तक्रार मानपाडा पोलीस ठाण्यात दिली होती. धक्कादायक बाब म्हणजे या कटात सुमितचे दोन अल्पवयीन मित्र देखील सहभागी असल्याचे निष्पन्न झाले आहे.या घटनेमुळे परिसरात एकच खळबळ उडाली आहे. याबाबत अधिक माहिती अशी की, २५ जानेवारी रोजी सकाळी दहा वाजण्याच्या सुमारास कल्याण ग्रामीण परिसरातील अडीवली गावातील एका विहिरीत एका इसमाचा मृतदेह सापडला आणि परिसरात एकच खळबळ उडाली. घटनेची माहिती मिळताच मानपाडा पोलिसांनी तत्काळ घटनास्थळी धाव घेऊन विहिरीत असलेल्या मृतदेहाला बाहेर काढण्यात आले, त्यावेळी त्याच्या कमरेला दगड बांधून विहिरी ढकलला असल्याचे निदर्शनास आले तसेच मृतदेहाच्या गळ्यावर वार करण्यात आल्याचे दिसून येत होते, त्यामुळे मानपाडा पोलिसांना या व्यक्तीची हत्या करून त्याला विहिरीत टाकून दिल्याचा संशय अधिक बळावला. पोलिसांनी याप्रकरणी हत्येचा गुन्हा दाखल करत मृतदेहाची ओळख पटवण्याचे काम सुरू केले. परिमंडळ-३ चे पोलीस उपायुक्त सचिन गुंजाळ, सहाय्यक पोलीस आयुक्त सुनील कुराडे वरिष्ठ पोलीस निरीक्षक अशोक होनमाने यांच्या मार्गदर्शनाखाली पोलिस अधिकारी राम चोपडे, दत्तात्रय गुंड, निशा चव्हाण, संपत फडोळ, प्रशांत आंधळे यांच्या पथकाने तपास सुरु केला असता अवघ्या काही तासात मृतदेहाची ओळख पटली. सदर मयत व्यक्तीचे नाव चंद्रप्रकाश लोवंशी असून तो डोंबिवली येथील दावडी परिसरात राहणार आहे. पोलिसांनी त्याची पत्नी रिता हिची चौकशी सुरू केली असता तिने उडवा उडवीची उत्तरे दिल्याने पोलिसांना तीच्यावर संशय आला. पोलीस खाक्या दाखवताच तिने तिचा प्रियकर सुमित विश्वकर्मा चे नाव सांगितले. पोलिसांनी तात्काळ सुमित विश्वकर्माला ताब्यात घेऊन या दोघांकडून माहिती घेतली असता पोलिसांना देखील धक्काच बसला. सुमित विश्वकर्मा व रीताचे गेल्या अनेक वर्षांपासून प्रेम संबंध होते, चंद्रप्रकाश हा या प्रेम संबंधाला अडचण ठरत असल्याने या दोघांनी त्याचा कायमचा काटा काढण्याचे ठरवले. चंद्रप्रकाशच्या हत्येचा कट गेल्या चार महिन्यापासून शिजत होता. अखेर २० जानेवारी, २०२४ रोजी त्यांनी संधी साधली व काटा काढला, या हत्येप्रकरणी सुमित विश्वकर्मा व त्याच्या दोन अल्पवयीन मित्रांनी एका इको कारमध्ये चंद्रप्रकाश याला टाकून एका निर्जन स्थळी नेले व त्या ठिकाणी चंद्रप्रकाशचा गळा चिरून पाठीवर, गुडघ्यावर वार करून क्रूरपणे हत्या केली.या हत्येचा संशय कुणालाही येऊ नये म्हणून त्याचा मृतदेह अडवली परिसरातील एका विहिरीत कमरेला दगड बांधून फेकून दिला. आपल्यावर बालंट येऊ नये म्हणून रिता लोवंशी हिने आपला पती चंद्रप्रकाश हा बेपत्ता असल्याची तक्रार मानपाडा पोलीस ठाण्यात नोंदवली होती, मात्र पोलिसांनी या हत्याकांडाचा तपास करून अवघ्या २४ तासात पोलखोल करत सुमित विश्वकर्मावर रीता लोवंशी या दोघांनाही बेड्या ठोकल्या.