कळव्यात रुग्णालयाच्या दरवाजाची कडी उचकटून मशीन व इतर साहित्य असा लाखोंचा ऐवज चोरट्याने केला लंपास
ठाणे – कळवा येथील एका रुग्णालयाच्या दरवाजाची कडी उचकटून जवळपास ५३,६१,०००/- रु.किंमतीचे साहित्य लांबवल्याची घटना उघडकीस आली आहे. या प्रकरणी कळवा पोलिस ठाण्यात गुन्हा दाखल करण्यात आला आहे. दरम्यान, या घटनेनंतर कळवा पोलिसांनी तात्काळ तपासाला सुरुवात केली असून आरोपी निष्पन्न करण्यासाठी प्रयत्न सुरू आहेत.
याबाबत आतिष दिनेश पाटील (वय ३८) यांनी कळवा पोलिस ठाण्यात फिर्याद दिली आहे. याबाबत माहिती अशी की, आतिष पाटील हे काम करीत असलेल्या सफायर रुग्णालय, कावेरी हाईट्स, कळवा, ठाणे पश्चिम या रुग्णालयाच्या मुख्य दरवाजाची कडी उचकटून त्यावाटे आत प्रवेश करून रुग्णालयातील विविध मशीन व इतर साहित्य असा एकूण ५३,६१,०००/- रु किमतीचा ऐवज चोरी करून नेला.
सदर प्रकरणी फिर्यादी यांनी दिलेल्या तक्रारीवरून अज्ञात आरोपीविरुद्ध गुन्हा रजि.नं.१५/२०२४,भा.ड.वि. कलम ४५४,४५७ व ३८० प्रमाणे गुन्हा दाखल करण्यात आला आहे. दरम्यान, पोलिसांनी घटनास्थळी भेट देत माहिती घेतली असून तपासाच्या अनुषंगाने आवश्यक पूर्तता केली असल्याची माहिती पोलिस उपनिरीक्षक काळे यांनी दिली. या प्रकरणी पोलिसांनी तपास सुरू केला असून आरोपी निष्पन्न करण्याचे प्रयत्न सुरू असल्याचेही काळे यांनी सांगितले.