पोलीस महानगर नेटवर्क

माणगाव : अधिक परताव्याचे आमिष दाखवून एका नागरिकाची तब्बल २८ लाख रुपयांची फसवणूक झाल्याची धक्कादायक घटना समोर आली आहे. या प्रकरणी माणगाव पोलिस ठाण्यात गुन्हा दाखल करण्यात आला असून, पुढील तपास पोलीस निरीक्षक (निवृत्ती) बोहाडे करीत आहेत.

पोलिसांनी दिलेल्या माहितीनुसार, ही घटना २० ऑगस्ट २०२५ ते २० ऑक्टोबर २०२५ या कालावधीत माणगाव तालुक्यातील नानोरे येथे घडली. फिर्यादी हे मुंबई–गोवा महामार्गालगत नानोर येथे वास्तव्यास असून, त्यांना अज्ञात व्यक्तीने मोबाईलवर संपर्क साधला. फोन करणाऱ्याने स्वतःला नुवमा वेल्थ मॅनेजमेंट लिमिटेड कंपनीच्या कार्यालयातून बोलत असल्याचे सांगितले.

यानंतर फिर्यादी यांना एका लिंकद्वारे ॲप डाउनलोड करण्यास सांगण्यात आले. सदर ॲपमार्फत ट्रेडिंग साइटवर तब्बल ₹२७,९६,८५१ इतकी गुंतवणूक करण्यास प्रवृत्त करण्यात आले. त्याबदल्यात ३० टक्के अधिक परतावा देण्याचे आमिष दाखवून संबंधितांनी फिर्यादीचा विश्वास संपादन केला.

परंतु गुंतवणुकीनंतर कोणताही परतावा किंवा मूळ रक्कम न मिळाल्याने फिर्यादींनी पोलिसांकडे धाव घेतली. तक्रारीच्या आधारे माणगाव पोलिस ठाण्यात फसवणुकीचा गुन्हा दाखल करण्यात आला आहे.

दरम्यान, रायगड जिल्ह्यात गेल्या काही महिन्यांपासून ऑनलाइन गुंतवणुकीच्या नावाखाली नागरिकांची फसवणूक करण्याचे प्रकार वाढत असून, पोलिसांनी नागरिकांना अशा फसवणूकप्रवृत्तीपासून सतर्क राहण्याचे आवाहन केले आहे.

The post गुंतवणुकीवर जास्त परतावा देण्याच्या आमिषाने २८ लाखांची फसवणूक; माणगाव पोलिसांत गुन्हा दाखल appeared first on Police Mahanagar.

योगेश पांडे/वार्ताहर 

माणगाव – लग्नाला निघालेल्या वऱ्हाडाच्या बसवर काळाने झडप घातली. पुणे-दिघी महामार्गावर ताम्हिणी घाटात कोंडेथर गावच्या हद्दीत बस उलटून भयंकर अपघात झाला. शुक्रवारी सकाळी १० वाजेच्या सुमारास ही घटना घडली. मिळालेल्या प्राथमिक माहितीनुसार, पुण्याहून बिरवाडीकडे लग्नासाठी निघालेली खासगी बस क्रमांक एमएच १४ जीयू ३४०५ पुण्याहून माणगांवकडे येत होती.

बस ताम्हिणी घाटात अवघड वळणावर आल्यानंतर रस्त्याच्या बाजूला पलटी झाली. हा अपघात इतका भीषण होता की, बसमधील ५ जणांचा जागीच मृत्यू झाला. २५ पेक्षा अधिक प्रवासी जखमी झाले आहेत. या अपघाताची माहिती मिळताच माणगाव पोलीस तातडीने घटनास्थळी दाखल झाले. स्थानिकांच्या मदतीने जखमींना उपचारासाठी उपजिल्हा रुग्णालय माणगाव येथे आणण्यात आले आहे. मृतांमध्ये ३ महिला आणि दोन पुरुषांचा समावेश आहे. संगिता धनंजय जाधव, गौरव अशोक दराडे, शिल्पा प्रदीप पवार, वंदना जाधव अशी मृतांची नावे असून, एका मृत व्यक्तीची ओळख अद्याप पटलेली नाही.

The post लग्नाला निघालेली बस ताम्हिणी घाटात उलटली; ५ वऱ्हाड्यांचा मृत्यू, २५ पेक्षा जास्त जखमी appeared first on Police Mahanagar.