डोंबिवलीत काँग्रेस नेते मामा पगारे यांच्याशी गैरवर्तन; भाजप पदाधिकाऱ्यांवर ॲट्रॉसिटी गुन्हा दाखल करण्याचा इशारा
पोलीस महानगर नेटवर्क
डोंबिवली : डोंबिवलीतील काँग्रेसचे ज्येष्ठ नेते मामा पगारे यांच्याशी भाजप पदाधिकाऱ्यांनी गैरवर्तन केल्याचा गंभीर आरोप पुढे आला आहे. मंगळवारी सकाळी भाजप पदाधिकाऱ्यांनी जातीवाचक शब्दांचा वापर करून आपल्यासह बहुजन समाजाचा अपमान केला असल्याचे पगारे यांनी माध्यमांसमोर सांगितले. याप्रकरणी अनुसूचित जाती अत्याचार प्रतिबंधक कायद्यांतर्गत पोलीस ठाण्यात तक्रार दाखल करणार असल्याचा इशारा त्यांनी दिला.
पगारे यांनी स्पष्ट केले की, भाजपचे जिल्हाध्यक्ष नंदू परब, रिक्षा संघटनेतील पदाधिकारी आणि अन्य कार्यकर्त्यांनी झुंडशाही करत आपल्यावर दबाव टाकण्याचा प्रयत्न केला. तसेच, सार्वजनिक ठिकाणी साडी नेसवून आपला व महिला वर्गाचा अपमान करण्यात आला, असेही त्यांनी सांगितले.
काँग्रेस जिल्हाध्यक्ष सचिन पोटे यांनीही भाजपच्या या कृतीचा तीव्र निषेध करत कठोर कारवाईची मागणी केली आहे. “डोंबिवलीतील सुसंस्कृत वातावरण बिघडवण्याचा प्रयत्न भाजप पदाधिकाऱ्यांनी केला असून, अशा गुन्हेगारी प्रवृत्तीच्या नेत्यांना कायद्याने धडा शिकवला पाहिजे,” असे पोटे यांनी म्हटले. या प्रकरणामुळे काँग्रेस-भाजप वाद पुन्हा चिघळण्याची शक्यता निर्माण झाली आहे.