“पैसे न दिल्यास तृतीयपंथी आणून बसविण्याची धमकी; शिलाई मशीन घेऊन पसार, महिलेच्या तक्रारीवरून महेश खडकेवर गुन्हा”
पोलीस महानगर नेटवर्क
पुणे – व्याजाने घेतलेले पैसे परत करत असूनही उर्वरित रक्कम त्वरित व्याजासह परत करावी, अन्यथा तृतीयपंथी आणून पार्लरमध्ये बसवतो, अशी धमकी देत अश्लील शिवीगाळ करत एका महिलेच्या पार्लरमधील शिलाई मशीन उचलून नेल्याची घटना घडली आहे. या प्रकरणी भारती विद्यापीठ पोलीस ठाण्यात महेश खडके याच्याविरुद्ध गुन्हा दाखल करण्यात आला आहे. या प्रकरणी ३७ वर्षीय महिलेने फिर्याद दिली असून पोलिसांनी दिलेल्या माहितीनुसार, फिर्यादीचे ब्युटी पार्लर आहे. त्यांचे आरोपी महेश खडके याच्याशी ओळखीचे संबंध होते. काही काळापूर्वी फिर्यादीने त्याच्याकडून ३० हजार रुपये उधार घेतले होते. त्यातील २१ हजार रुपये परत करण्यात आले होते.
परंतु, उर्वरित रक्कम व्याजासह लगेच परत करावी, अशी मागणी करत आरोपी १५ दिवसांपूर्वी पार्लरवर आला. त्याने अश्लील शिवीगाळ करत पार्लरमध्ये तृतीयपंथी आणून बसवण्याची व घरी येऊन त्रास देण्याची धमकी दिली. शिवाय, पार्लरमधून शिलाई मशीन जबरदस्तीने घेऊन गेला. यानंतरही मशीन परत न दिल्याने संबंधित महिलेने अखेर पोलिसांत धाव घेतली. या प्रकरणी महेश खडकेविरुद्ध भारतीय न्याय संहिता कलम ७९ (स्त्रियांचा अपमान), ७४ (धमकी देणे), ३५१(१) (विनयभंगाच्या उद्देशाने बळाचा वापर) अंतर्गत गुन्हा दाखल करण्यात आला आहे. मात्र, आरोपीकडून पैसे व्याजाने घेतले गेले असूनही त्याच्यावर सावकारी विरोधी कायद्यानुसार गुन्हा दाखल झालेला नाही, हे विशेष आहे. या प्रकरणाचा तपास पोलीस उपनिरीक्षक निकम करीत आहेत.