पोलीस असल्याचे सांगून वृद्धाची फसवणूक; १० ग्रॅम सोन्याची अंगठी लंपास, खामगाव तालुक्यातील घटना
पोलीस महानगर नेटवर्क
खामगाव – पोलीस असल्याचा बनाव करत ६६ वर्षीय वृद्धाची फसवणूक करण्यात आली असून, सुमारे ९० हजार रुपये किमतीची सोन्याची अंगठी लंपास करण्यात आली आहे. ही धक्कादायक घटना खामगाव शहरातील नांदुरा रोड परिसरात घडली असून, शिवाजीनगर पोलीस ठाण्यात अज्ञात दोघांविरोधात फसवणुकीचा गुन्हा दाखल करण्यात आला आहे.
घटनेचा तपशील:
पीडित मोतीराम तोताराम लाहुडकार (वय ६६, रा. चिखली बु., ता. खामगाव) हे सोमवारी सायंकाळी ६ वाजताच्या सुमारास आपल्या दुचाकीने नांदुरा रोडवरील संतोष देशमुख यांच्या शेताजवळून गावाकडे परत जात होते. याच दरम्यान दोन अनोळखी व्यक्तींनी त्यांना अडवले व “आम्ही पोलीस आहोत” असे सांगून तपासणीच्या बहाण्याने त्यांच्याकडील जुनी बदामी आकाराची सोन्याची अंगठी (वजन सुमारे १० ग्रॅम) घेतली आणि तेथून पलायन केले. घटनेनंतर लाहुडकार यांनी तात्काळ शिवाजीनगर पोलीस ठाण्यात तक्रार दाखल केली. त्यांच्या तक्रारीनुसार गुन्हा नोंदवण्यात आला असून, डीबी पथकातील अंमलदार एचसी शेळके हे या प्रकरणाचा तपास करीत आहेत.
परिसरात वाढलेली चिंता:
या प्रकारामुळे नागरिकांमध्ये भीतीचे वातावरण पसरले आहे. पोलिसांनी नागरिकांना सावध राहण्याचे आवाहन केले असून, पोलीस असल्याचा दावा करणाऱ्या अनोळखी व्यक्तींना प्रथम ओळख पटवूनच सहकार्य करावे, असे सांगण्यात आले आहे.