पती बाहेर नेत नाही म्हणून महिलेने पोटच्या साडेचार महिन्यांच्या चिमुकलीची हत्या; स्वतः देखील केली आत्महत्या
योगेश पांडे / वार्ताहर
पालघर – मातृत्वाला काळीमा फासणारी एक धक्कादायक घटना डहाणू तालुक्यात घडली आहे. येथे एका आईने पोटच्या साडेचार महिन्यांच्या चिमुकलीची हत्या केल्याची संतापजनक घटना घडली आहे. त्यानंतर तिने स्वतः देखील आत्महत्या केली आहे. पती बाहेर फिरायला नेत नाही या कारणावरुन या महिलेने इतकं टोकाचं पाऊल उचललं असल्याची माहिती आहे. या घटनेमुळे डहाणू परिसरात एकच खळबळ उडाली आहे. पालघर जिल्ह्यातील डहाणू तालुक्यातील शिसणे- शिपाईपाडा येथे जयेश राजड आणि मनीषा राजड हे दाम्पत्य सुखाचा संसार करत होते. त्यांना साडेचार महिन्यांची एक चिमुकली होती. अनुश्री असं तिचं नाव होतं. जयेश राजड हे मासेमारी बोटीवर खलाशी असल्याने ते नेहमी घराबाहेरच असायचे. मात्र, पावसाळा सुरु असल्याने ते घरी परतले होते.
रविवारी जयेश आपल्या मित्रांसोबत फिरण्यासाठी गेले होते. याच दरम्यान पती जयेश आपल्याला फिरण्यासाठी बाहेर नेत नाही याचा राग मनात धरून पत्नी मनीषा राजड हिने मातृत्वाला काळीमा फासणारे पाऊल उचलले. आधी तिने आपल्या पोटच्या साडेचार महिन्यांची चिमुकली अनुश्रीची गळा आवळून हत्या केली. त्यानंतर मनीषा हिने स्वतः राहत्या घरात नायलॉन दोरीच्या साहाय्याने गळफास घेऊन आत्महत्या केली. या संपूर्ण घटनेमुळे परिसरात एकच खळबळ माजली असून चिमुकलीची हत्या करुन आईने स्वत:ला संपवल्याने सर्वत्र हळहळ व्यक्त होत आहे. या घटनेची माहिती मिळताच उपविभागीय पोलीस अधिकारी गणपत पिंगळे, कासा पोलीस ठाण्याचे अधिकारी नामदेव बंडगर आणि कासा पोलीस ठाण्यातील अधिकारी, कर्मचाऱ्यांनी घटनास्थळी भेट दिली. त्यांनी घटनास्थळाची पाहणी केली. घटनास्थळाचा पंचनामा करून दोन्ही माय- लेकींचे मृतदेह ताब्यात घेतले. दोन्ही मृतदेह शवविच्छेदनासाठी रुग्णालयात पाठवण्यात आले आहेत. याप्रकरणी कासा पोलिसांत गुन्हा दखल करण्यात आला असून पोलीस अधिक तपास करीत आहेत.