नाशिकमध्ये तब्बल दोन कोटीहून अधिक रूपयांना गंडा; पोलीस ठाण्यात गुन्हा दाखल
पोलीस महानगर नेटवर्क
नाशिक – राज्यात सर्वच ठिकाणी शेअर्स मार्केटच्या नावाखाली ऑनलाईन फसवणुकीचे प्रकार दिवसेंदिवस वाढताना दिसत आहेत.अशीच एक घटना नाशिकमध्ये घडली आहे. एकाने १५ ते २० जणांना तब्बल दोन कोटीहून अधिक रूपयांना गंडा घातल्याचा प्रकार समोर आला आहे. शेअर मार्केट मधील गुंतवणुकीतून जास्तीच्या मोबदल्याचे आमिष दाखवून ही फसवणूक करण्यात आली. तब्बल तीन वर्षापासून गाशा गुंडाळून हा भामटा पसार झालेला आहे. त्यानंतर तो आता गुंतवणुकदारांच्या हाती लागल्याने हा प्रकार पोलीसात पोहचला असून याप्रकरणी मुंबईनाका पोलीस ठाण्यात फसवणुकीसह विविध कलमान्वये गुन्हा दाखल करण्यात आला आहे
पंकज प्रभाकर बाविस्कर (रा.सुमन अपा.राम मंदिराजवळ,श्रीरामनगर वडाळा पाथर्डीरोड) असे अटक करण्यात आलेल्या संशयित ठकबाजाचे नाव आहे. याबाबत ज्योती राजेश दायमा (रा.अश्विननगर,सिडको) यांनी फिर्याद दाखल केली आहे. संशयिताने सन.२०१६ मध्ये वडाळा पाथर्डी रोडवरील आपल्या राहत्या ठिकाणी बाविस्कर एंटरप्रायझेस या नावाची फर्म स्थापन केली होती. गुंतवणुकीवर तीन वर्षात दामदुप्पट तसेच दामदुप्पट न झाल्यास १८ टक्के परताव्याची हमी दिली होती. अल्पावधीत भरधोस मोबदल्याचे प्रलोभन दाखविण्यात आल्याने दायमा दांम्पत्यासह अन्य १५ ते २० गुंतवणुकदारांनी संशयिताकडे तब्बल २ कोटी ८ लाख ५० हजार रूपयांची गुंतवणुक केली होती.
मात्र हा भामटा मार्च २०२१ मध्ये कुटूंबासह फरार झाल्याने या घटनेवर पडदा पडला होता. बुधवारी (दि.१७) संशयित पंकज बाविस्कर गुंतवणुकदारांच्या हाती लागल्याने हा प्रकार पोलीसात पोहचला असून आर्थिक गुन्हे शाखेने त्यास बेड्या ठोकल्या आहेत. संशयिताने अनेक गुंतवणुकदारांना गंडविल्याची चर्चा असून फसवणुक झालेल्या नागरीकांनी पोलीसांशी संपर्क साधावा असे आवाहन करण्यात आले आहे.